Bi armanca pêşketina asta fikirî ya jinan û sekna li dijî şerê taybet, Kongreya Star ya taxa Şêxmeqsûd ya bajarê Helebê plansaziyeke berfireh ji bo perwerdekirina jinên taxê derxist.
Kongreya Star ji destpêka ku hatiye avakirin ve, jinan bi rêxistin dike. Bi rêya vekirina dewreyên bîrdozî û akademiyên fikirî wan perwerde dike û li ser vê tekoşinê bi hezaran jin ji jîna bindestiya zilam rizgar kirin e.
Di vê çarçoveyê de Kongreya Star, bi beşdarbûna 21 jinan dewreyeke perwerdeyê ya vekirî da destpêkirin, dewre dê 14 rojan, ji saet 09:00 heta 12:00’an wê berdewam bike.
Tişta balkêş a di vê dewreyê de ew e ku jinên temen mezin tev li bûne, da ku asta xwe ya fikirî bilind bikin û hîn zêdetir dîroka xwe nas bikin.
Zelûx Elîko 50 salî ye ji gundê Kerko yê girêdayî navçeya Mabata ya kantona Efrînê ye, tev li perwerdeyê bûye. Zelûx Elîko axivî û got: “Min biryar da ku tevli perwerdeya fikirî bibim da ku hîn zêdetir têkoşîna jinan a ji destpêka dîrokê ve û heta roja me ya îro nas bikim.”
Zelûx tevî keça xwe ya 24 salî li akademiya Kongreya Star perwerdeyên bîrdozê dibîne. Armanca van perwerdeyan ew e ku jin hîn zêdetir baweriyê bi xwe bînin, azadiya xwe nas bikin û rastiya xwe ne li gorî mentiqê adetên paşverû nas bikin.
Zelûx Elîko bal kişand ser destkeftiyên jinan di şoreşa Rojava de û ev xal lê zêde kir: ” Di şoreşa 19’ê Tîrmehê de min rola jinan bêtir nas kir, jinan karibîn bendan bişkînin û di qada siyasî û leşkerî de cih bigirin û li ser bingeha xeta sêyemîn a neteweya demokratîk hebûna xwe isbata kirin.”
Zelûx Elîko got, divê fikirê rêber Abdullah Ocalan hîn bêtir were belavkirin.
ꞌdivê jin xwe bi rêxistin Bikinꞌ
Bernameyê perwerdeyê ji waneyên cuda pêk tê, ji wan”Girîngiya Perwerdê, Civaka Xwezayî, Zayendperestî, Çand û Exlaq, Rastiya Rêbertiyê, Dîroka Jin, Koçberî û Welatparêzî û mîsaqa Kongreya Star”.
Têkildarî armanca vekirina dewreyan, endama Komîteya Perwerdeyê ya Akademiya Kongreya Star Delal Mihemed diyar kir ku dewre bi navê Şehîd Cîhan ji bo pêşxistina jinan di aliyê çandî û bîrdozî de hatiye vekirin.
Delal Mihemed ev xal li gotina xwe zêde kirin: “Di demên dawî de hin aliyan şerê taybet di nava welatiyan de meşand û da ku gel hişyar be, divê destpêkê em jinan perwerde bikin, ji lew re me ev dewre vekir ku ji waneyên cur be cur pêk tên.”
Delal Mihemed îşaret pê kir ku elaqeya jinan a ji perwerdeyê re baş e û pê re xîtabî tevahiya jinên li taxê kir ku li dîroka xwe vegerin, xwe bi rêxistin bikin û asta têkoşîna xwe bilind bikin.
Tê payîn ku dewre li tevahiya taxê were vekirin.
ANHA