Endamên Meclisa Dayîkên Aştiyê diyar kirin ku tecrîdê qebûl nakin û banga rakirina tecrîdê kirin. Herwiha gotin, aştiyeke mayînde tenê dikare vî welatîrizgar bike û riya vê aştîyê jî di Îmralî re derbas dibe. Bila dewlet û saziyên mafên mirovan yên navneteweyî dengê me bibihîzin.
‘Bila dengê me bibihîzin’
Endama Meclîsa Dayikên Aştiyê ya Sêrtê Maşallah Işik Arslan diyar kir ku ji bo tecrîd rabe ji Sêrtê heta Êlihê hatine û destnîşan kir ku zarokên wan ne ji bo xwe ji bo azadiya gelê kurd ketine greva birçîbûnê. Maşallah wiha dirêjî da axaftina xwe: “Bila ev tecrîd êdî rabe. Em dixwazin bila hemû kes xwedî li wan derkeve û dengê xwe bilind bikin. Dilê me zêde dişewite. Ji ber ku em dayik in. Em naxwazin kezeba tu dayikan bişewite. Heke tecrît rabe wê dilê tu dayikan ewqas naşewite. Dayikên ku di xema zarokên xwe de ne nikarin bi rehetî serê xwe dayinin ser balîfê. Di nav girtigehê de girtîgeh heye. Tu pêdîviyên wan nayên bi cîh anîn. Em naxwazin ku girtî zerarê bibînin. Bila dewlet û saziyên mafên mirovan ên navneteweyî dengê me bibihîzin.”
‘Em tecrîdê qebûl nakin’
Endama Meclîsa Dayikên Aştiyê ya Sêrtê Taybet Tekîn jî anî ziman ku kurê wê 27 sal in girtî ye û got: “Li girtîgehan roj namîne ku mafên girtiyan neyê binpêkirin û zilm li wan neyê kirin. Tî û birçî ne û aveke paqij jî nadin wan. Zarokên me jixwe di bin destê we de ne. Qey zarokên we tune ne ku hûn ewqas dilê dayikan dişewitînin. Gava kurê min ket girtîgehê 15 salî bû. Jiyana wî li girtîgehê derbas bû. Em agahiyên îşkenceyan digirin nikarin razên. Hertim rewşa zarkên me di hişê me de ye. Fikarên me gelek zêde ne. Em tecrîdê qebûl nakin. Bes êdî em aştiyê dixwazin. Bila erdogan li pêkanînên xwe yên dijmirovî binêre. Kî serê xwe radike ew tê çewisandin. Dewlet e lê ne edalet ne jî hiqûq û mirovatî pê re tune ye. Ji îşkenceyê pê ve tiştek nayê kirin. Em naxwazin xwîn bê rijandin. Dayik ne aliyê rijandina xwînê ne û tenê aştiyê dixwazin.”
‘Dewlet gav bi gav işkence dike’
Endama Meclîsa Dayikên Aştiyê ya Sêrtê Fatma Kaya jî diyar kir ku du zarokên wê bi salan in girtî ye û wan nikare bibîne. Fatma, got: “ Zarokekî min 11 sal in li Iraqê girtî ye û ez nikarin wî bibînim. Em êdî çi bikin nizanim, dewlet li me zilm dike. Em jî tenê aştiyê dixwazin. Dewlet bi her awayî îşkencê li me dike. Divê êdî ev neye qebûlkirin hemû kurd rabin ser piyan û dengê xwe bilind bikin.”
‘Bila çareseriyek bê dîtin’
Endama Meclîsa Dayikên Aştiyê ya Rihayê Hedlê Ogur jî ji bo şikandina tecrîdê û daxwaza aştiyê ji Rihayê heta êlîhê hatiye. Hedlê diyar kir ku divê daxwazên girtiyan bên ecih û wiha got: “Rewşa girtîyan her roja ku derbas dibe xirabtir dibe. Divê mafên girtîyan bidin. Pêvajoya grevên birçîbûnê giran derbas dibe. Pêwiste ku em çareseriyek mayînde pêk bînin. Bila tecrîd bi dawî bibe û girtî ji vê greve derkevin. Bila rêyek çareseriyek bê dîtin û ev zilm bi dawî bibe. Em aştiyekê bi rûmet dixwazin.”
‘Em edaleta xwînrijandinê naxwazin’
Endama Meclîsa Dayikên Aştiyê ya Stenbolê Hîkmîye Onel jî destnîşan kir ku ew ne ji bo şer ji bo pêkanîna aştiyê hatine gel hev û got: “Me dorpêç kirin e. Li girtîgeha Antalyayê xwestine lêgerîna tazî bikin lê ji bo ku girtî qebûl nekiriye ji ber lêdanê niha di komayê de ye. Li Tirkiyê edalet ewqas e. Em edaletê dixwazin. Em bang li her kesî dikin ku li dijî vê zilmê rabin ser piyan. Em aştiyê dixwazin.”
‘Aştî tenê dikare vî welatî rizgar bike’
Endama Meclîsa Dayikên Aştiyê ya Wanê Zekîye Kaya jî destnîşan kir ku ji bo daxwaza edaletê hatine vir û wiha bang li Erdogan kir: “Em naxwazin zarokên me zerarê bibînin. Bes êdî rondik ji çavên dayikan bibarin. Em mirinê naxwazin. Dayikên ku ji Amedê hatin nehiştin ku werin Êlihê û cezayê pere li wan birîn. Laçikên spî yên dayikan tên wateya aştî yê. Vî welatî tenê aştî dikare rizgar bike.”
‘Bila êdî tecrîd rabe’
Endama Meclîsa Dayikên Aştiyê ya Wanê Hanîfe Kaçak jî got ew xwîşk û biratî dixwazin û wiha axivî: “Em ne şer ne jî mirinê dixwazin. Bila nehêlin ji girtîgehan cinaze derkevin. Em ji bo zarokên xwe bang dikin. Ji bo ku edalet û hiqûq were vî welatî divê tecrîd rabe. Em carek din wê êşê nikarin rakirin. Bila zilma li ser zarokên me rakin û daxwazên wan qebûl bikin.”
JINNEWS