Nûnerê PYD’ê yê li Başûrê Kurdistanê diyar kir ku dewleta Tirk dixwaze tevahiya Başûrê Kurdistanê dagir bike û bi hinceta şerê dijî PKK’ê êrîşên xwe li ser Başûr berfireh kirine û dixwaze destkeftiyên Başûr têk bibe.
Nûnerê Partiya Yekîtiya Demokratîk PYD’ê yê li Başûr Kurdistanê Silêman Ereb derbarê armanca êrîşên dewleta Tirk li ser xaka Başûrê Kurdistanê axivî û diyar kir ku gelê Kurd di şerê li dijî çeteyên DAIŞ’ê li Rojava û Başûrê Kurdistanê destkeftiyek mezin bi dest xistiye û got; “Ji bo Kurdan giringe ku van destkeftiyan biparêzin. Ji ber dewletên dagirker weke Tirkiyê dixwaze bi van êrîşan van destkeftiyan tine bikin. Naxwaze li Rojhilata Navîn statuyek Kurdan hebe. Ji bo wê jî dewleta Tirk îro sînorên xaka Başûrê Kurdistanê dagir kirine. Dixwaze aramî û îradeya Kurdan tine bike û krîzên xwe yên hundirîn derxe ji dervey welat.”
Ereb di berdewama axaftina xwe de diyar kir ku êrîşên dewleta Tirk li ser tevahiya gelê Kurd e û wiha berdewam kir; “Li Rojavayê Kurdistanê dewleta Tirk piştgiriya çeteyan dikir û êrîşê kantonên Rojava dikir. Gelo ma li wir PKK hebû? Na. Niha jî bi hinceta hebûna PKK’ê êrîşê xaka Herêma Kurdistanê dike. Kurd li kûderê serî rakin, dewleta Tirk êrîşê wan dike. Ji bo wê jî ev êrîş li ser tevahî gelê Kurd e.”
Her wiha Ereb bal kişande ser hebûna baregehên leşkerên Tirk li ser xaka Başûr û got; “Her cihê dewleta Tirk dagir kir, bi hêsanî jê dernakeve. Niha li ser xaka Başûr bi dehan baregehên dewleta Tirk hene. Divê li dijî dagirkeriya dewleta Tirk helwestek netewî û cidî were nîşandan.”
Di dawiyê de Silêman Ereb anî ziman ku ger Kurd bixwazin bibin xwedî statû, divê yekîtiya xwe çêbikin û wiha got; “Ji aliyê hinek rayedarên Başûr ve pîrozkirina Erdogan a di hilbijartinên derbasbûyî yên Tirkiyê de, rewakirina êrîşên li ser xaka Başûrê Kurdistanê ye.”…ROJNEWS
Tirkiye dixwaze destkeftiyên Başûr tine bike
