Rewşa ewlehiya parêzgeha Kerkûkê her diçe aloztir dibe. Ev jî bûye sedem ku beşek ji welatiyan malên xwe terk bikin.
Demeke li sînorê parêzgeha Kerkûkê kuştin, dizî û revandin zêde bûye û bûye pirsgirêkek mezin. Li aliyek din jî liv û tevgera çeteyên DAIŞ’ê ya li sînorê herêmê zêde kiriye. Ev jî bûye sedem ku çarenûsa ewlehiya Kerkûk bikeve rewşek nediyar.Li gor agahiyan, niha hêzên ewlehiyê li Kerkûk bi armanca parastina ewlehiya bajar û vegera armiya ji bo bajar lijneyek ava kirine. Li bajar ewlehiyek zêde kirine. Belê hîna nekarîne ewlehiya bajar biparêzin.
Di şeva 25’ê Hezîranê de çeteyên DAIŞ’ê êrîşê gundê Elî Sera yê girêdayî bajarokê Daqoqê li sînorê Kerkûkê kirin. Gundê Elî Sera yê Kurdên Kakeyî ye. Di êrîşa çeteyên DAIŞ’ê de welatiyek hate kuştin û 3 welatiyên din jî birîndar bûn. Kurdên Kakeyî bûne armanca êrîşên çeteyên DAIŞ’ê.
Heya niha hêzên Iraqê çend caran li Kerkûkê ji ber gulereşandine li derdorê, çend welatî hatine kuştin û birîndar bûne. Du roj berê jî li Xurmatû cenazeyên 8 welatiyên hatine kuştin hate dîtin.
Rayedarên Kurd ên li Kerkûkê çend caran nerazîbûn nîşanî rewşa xerab a ewlehiya bajar dan û diyar kirin ku wê li ser hêzên ewlehiyê dozê vekin.
Parlamentere YNK’ê li parlamentoya Iraqê Mihemed Osman derbarê rewşa Kerkûkê de dibêje; “Parêzgeha Kerkûkê di nava çend mehên borî de bi planek metirsîdar re rû bi rû bûye. Ev jî bi desteka hinek kes û aliyên siyasî ji bo hedefgirtina tevahî Kurdên li parêzgeha Kerûkê tê kirin. Hewl didin ku Kurdên herêmê neçar bikin warê bav û kalên xwe terk bikin.”
Her wiha parlamenterê PDK’ê yê Kerkûk li Bexda Şaxewan Ebdullah jî li ser rewşa Kerkûkê got; “Di demên borî de ji aliyê DAIŞ’ê ve li ser gundên Kakeyiyan, gundên Talebanî û Dawde yên li Daqoqê êrîş pêk hatine. Ji ber vê sedemê tenê di nava du hefteyan de 200 malbatên Kurdan ji malên xwe derketine.”
Çarenûsa Kerkûkê ne diyar e
