Li navenda Efrînê leşker û çeteyên dagirker derbên giran dixwin û her roj windahiyan didin. Li navenda Efrînê li nuqteyên çeteyan sê teqînên dijwar rû dan. Hat ragihandin ku di van teqînan de herî kêm 20 dagirker hatine kuştin û gelek ji wan jî birîndar bûne. Piştî teqînan hat gotin ku dagirker di nava Efrînê de seferbûne û hemû riyên bajar girtine.
Li navenda Efrînê ku ji aliyê dewleta Tirk ve hatiye dagirkirin, li nuqteyeke çeteyan 2 teqînên dijwar rû dan. Teqînek jî li nêzî Nexweşxaneya Dersimê bû. Tê gotin ku ji ber teqînê gelek kes mirine û birîndar bûne.
Li gorî agahiyên ku çavkaniyekî li nava bajêr ragihand, teqîn roja Çarşemê saet 12:35’an rû dan. Çavkaniyekî bi navê H.A. ragihand ku herdu teqîn li nuqteyeke çeteyên eniya El Şamiye rû dane ku li nêzî çerxerêya Kawayê Hesinkar ê li navenda bajêr e.
Tê gotin ku teqîn bi wesayitên bombebarkirî hatine kirin û gelek kes mirine û birîndar bûne. Lê belê li ser mijarê agahiyeke berfireh bi dest neket. Hin çavkanî dibêjin, teqînan rê li ber xisareke mezin a madî jî vekirine.
Demeke kin piştî herdu teqînan, vê carê li kolana Feylakê dengê teqînê hat. Ji ber teqîna li nêzî Nexweşxaneya Dersimê, herî kêm 20 çete mirin.
Dagirker niha li Efrînê seferber bûne û hemû rêyên bajêr girtine.
Nayê zanîn bê teqîn ji aliyê kê ve hatiye kirin.
Dewleta Tirk tevî çeteyên xwe bi rêk û pêk li herêmê sûcên şer dike. Hêzên Tirk roja 20’ê Çileyê dest bi êrîşên dagirkeriyê kirin. 18’ê Adarê jî tevlî çeteyên xwe ketin nava navenda bajêr. Ji dema destpêkirina êrîşên dagirkeriyê û vir ve bi sedan sivîl hatin kuştin, bi sedan kes jî hatin revandin. Her wiha mal û milkên Kurdan hatin talankirin.
