Piştî ku Konferansa Rizgarkirina Efrînê hat lidarxistin û seferberiya giştî hat ragihandin, delegeyên konferansê li ser encamên konferansê civînan ji gelê Efrînê yê li Şehbayê re lidardixin. Di civînan de encam û biryarên konferansê tên nirxandin. Welatiyên Efrînê jî diyar kirin ku ew amade ne tevlî serferberiyê bibin û Efrînê rizgar bikin.
Civînên ku delegeyên Konferansa Rizgarkirina Efrînê ji gel re lidar dixin didomin û gelê Efrînê di civînan de anîn ziman ku ew ê ji bo rizgarkirina Efrînê têbikoşin.
Li navçeya Ehrez, Fafîn, Til-Qerah, Ehdas û Kefer Naya yên kantona Şehba civîn ji aliyê delegeyên Konferansa Rizgarkirina Efrînê ve hatin lidarxistin û bi sedan şêniyên kantona Efrînê ku li Şehba dimînin, tevlî civînan bûn.
Di civînê de encamnameya Konferansa Rizgarkirina Efrînê hat xwendin. Her wiha delegeyan mijarên di konferansê de nirxandin û bi gel re parve kirin. Di veguheztina encama konferansê ji gel re Rêveberiyan anîn ziman ku wan di konferansê de xebatên xwe yên Efrînê nirxandine û rexnedayîna xwe dane.
Di civînan de delegeyan balkişandin ser berxwedaniya 58 rojan a Efrînê û anîn ziman ku divê gelên Sûriyê û bi taybet gelê Efrînê ji bo rizgarkirina Efrînê têkevin seferberiyê û xwe li ser wî bingehî birêxistin bikin.
Her wiha di civînan de hat ziman ku gelê Efrînê li kantona Şehba li ber xwe dide, xwe birêxistin kir û niha xwe li gorî şert û mercên şer perwerde dike, xebatên xwe yên dîplomasî hîn xurtir kirine û dixebitin ku Efrîn ji dagirkeriya Tirkiyê rizgar bikin.
Gelê Efrînê jî di van civînan de anîn ziman ku ruhê Berxwedaniya Serdemê her diçe geştir dibe û ew amade ne ku tevlî serferberiyê bibin û Efrînê ji dagirkeriya Tirkiyê rizgar bikin…ANHA
