Berpirsê Komîteya pêşmergeyên Dêrîn beşê girtiyên siyasî yê YNK’ê Mam Hejar diyar kir ku armanca dewleta Tirk dagirkirina tevahî Başûre û got; “Ji ber berjewendiyên hizbî kongreya netewî pêk nayê.”
Berpirsê Komîteya pêşmergeyên Dêrîn beşê girtiyên siyasî yê YNK’ê Mam Hejar derbarê dagirkeriya dewleta Tirk û êrîşên li ser xaka Başûrê Kurdistanê da zanîn ku dewleta Tirk bi hincetên cûda êrîşê Başûrê Kurdistanê dike.
Mam Hejar daxuyakirin ku dewletên dagirkerên Kurdistanê naxwazin ti carê Kurd bigehin azadiya xwe û serbixwe bijîn.
Mam Hejar bal kişande ser bêtifaqiya aliyên Başûrê Kurdistanê li dijî dagirkeriyê û wiha dewam kir; “Her cara mijar dijbertiya Kurdan be, Tirkiye, Îran, Iraq û Sûriye dibin yek. Lê li hemberî dagirkeriyê Kurd nabin tifaq. Li Başûrê Kurdistanê dijî dagirkeriya heyî tifaqek nîne. Ji ber berjewendiyên hizbî yên li gel dagirkeran, rê nade em eniyek netewî ava bikin.”Mam Hejar bal kişande ser giringiya lidar xistina kongreya netewî û got; “Ji ber berjewendiyên hizbî kongreya netewî nayê lidarxistin. Dewleta Tirk jî bi hinceta PKK’ê êrîşê Başûr dike. Gelo li Herîr, Rewanduz, Başîqa û Şengalê PKK heye? Na. Lê berjewendiyên hinek aliyên siyasî yên Başûrê Kurdistanê li gel dewleta Tirk rê dide vê. Hebûna 27 baregehên leşkerê Tirk li ser xaka Başûr, bi armanca dagirkeriyê ye.”
Di dawiyê de Mam Hejar daxwaz ji parlamentoya Iraqê û Başûrê Kurdistanê kir ku daxwaza derketina baregehên leşkerên Tirk ji Başûr bikin û got; “Divê gelê Kurd ji bo bighije azadî û serxwebûna xwe, yekîtiya xwe çêbike.”…ROJNEWS
Armanc dagirkirina tevahiya Başûr e
