Li kampa Eyn Îsa ya ku bi hezaran koçber lê dimînin bi hatina havînê û zêdebûna germê re şert û mercên jiyana koçberan jî zehmet buye. Koçberên ku konên wan ji ber şertên hewayê bê erk mabûn zehmetî dikişandin. Rêveberiya Kampê bi alîkariya rêxistina ENHCR’yê li kampê konên nû datîne.
Rêveberiya Kampa Eyn Îsa di çarçoveya plana xwe ya nû de dest bi danîna konên nû kir.
Ji ber rewşa hewayê hezar û 300 konên di kampa Eyn Îsa de bê fonksiyon man. Rêveberiya kampê li ser daxwaza welatiyên koçber, bi alîkariya Komîseriya Bilind a Karûbarên Koçberan (UNHCR) dest bi guhertina konan kir.
Rêveberiya kampê plana xwe ya guhertina konan danî û dest bi alîkariya welatiyên koçber kir. Li gorî plana heyî dê niha rojane 30 kon werin dayîn. Rêveberiyê ji UNHCR’yê 550 kon wergirtine.
Komîteya Kampan a meclisa navçeyê 50 karker ji bo danîna konan erkdar kirin. Koçberan spasiya rêveberiya kampê kir ku demildest bersiva wan da.
Derbarê mijarê de endamê rêveberiya kampê Xelîl El-Şetî diyar kir ku beriya niha tu bersiv tune bû û da zanîn ku niha wan 550 kon ji UNHCR’yê û 80 konên din ji Rêxistina Bijîşkên Sînornenas wergirtine…ANHA
