Artêşa Tirk a dagirker rê nade welatiyên herêma Bradostê biçin, agirê ku ji ber bomberdûmana balafiran li daristanê ketî bivemirînin. Ji bo welatiyan hatiye gotin ji bo vemirandina agir biçin herêmê wê bên hedefkirin.
Piştî ku balafirên şer ên artêşa Tirk a dagirker gundên Sinîn, Robî, Rual, Pungstale ên herêma Biradostê bombebaran kirin û şûnde, agir bi zevî û baxçeyên welatiyan ketiye. Agirê ku bi bax û baxçeyên welatiyan ketî hê jî dişewite.Welatiyan xwest ku biçin agirê ku bi bax û baçeyên wan ketî vemirînin, lê leşkerên artêşa Tirk ji bo welatiyan ragihandiye ku rê nadin welatî biçin herêmê. Leşkerên artêşa Tirk bi rêya keyeyê gund daye diyarkirin ku eger welatî biçin herêmên navborî wê bomberdûman bikin.Jiyana welatiyên herêma Biradostê piranî li ser bax û baxçevanî û çandiniyê ye. Lê di roja îro de ji ber bombebaran û êrîşên artêşa Tirk a dagirker ziyanên mezin gihiştine cihên wan ên çandiniyê. Welatiyên herêmê gilî û gazincan ji hikûmeta Herêma Kurdistan û Iraqê dikin ku eger pêşiya van êrîşan negirin, jiyana wan di metirsiyê de ye û nikarin debara xwe bikin.
Bax û baxçeyên welatiyan dişewite
