Hevseroka Kantona Efrînê Hêvî Mistefa, Endama Kongreya Star a Efrînê Emîne Dîngîlî û Endama Rêveberiya Yekîtiya Êzidiyan a Herêma Efrînê Suad Hiso li ser hilbijartinên li Tirkiyê axivîn û diyar kirin ku divê gelê bakurê Kurdistanê û bi taybet jî jin ji bo azadiyê dengê xwe bidin HDP’ê.
Jinên Endamê Rêveberiya Xweseriya Demokratîk a Efrînê derbarê hilbijartinên 24’ê Hezîranê yên Tirkiyê de gotin:”Gelê Kurd yê Bakurê Kurdistanê dema ku çûn ser sindoqan bila Sûr, Nisêbîn, Cizîr, Şirnexê ji bîr nekin û ji bo demokrasiyê û aştiyê dengên xwe bidin HDP’ê”
Jinên Endamê Rêveberiya Xweseriya Demokratîk a Efrînê derbarê hilbijartinên 24’ê Hezîranê yên li Tirkiyê diyar kirin ku divê pergala yekperest a li Tirkiyê bê guhertin û gotin: “Bi salane Tirkiye ji aliyê kesên ku pergala yekperestiyê diparêzin tê birevebirin. Ji bo ev pergala faşîst bê guhertin û ev şer biqede divê hemû kes dengê xwe bidin HDP’ê.”
Hevseroka Kantona Efrînê Hêvî Mistefa diyar kir ku bi êrîş û zextên dewleta tirk yekîtiya gelan hedef hat girtin û got: “Divê li dijî kesên ku yekîtiya gelan hedef digire em berxwe bidin. Divê Gelê Kurd ê li Bakurê Kurdistanê di 24’ê Hezîranê de biçin ser sindoqan û bersiva kesên ku yekîtiya gelan hedef digire bidin. Ji bo jiyanek azad û serbixwe divê Erdogan têk here.”
Endama Kongreya Star Emîne Dîngilî diyar kir ku divê gelê Kurd li sindoqan xwedî derkevin û got: “Dema ku gelê Kurd ê Bakurê Kurdistanê çûn ser sindoqan divê Sûr, Şirnex, Nisêbîn û Cizîrê ji bîr nekin û li ser sindoqan xwedî li îradeya xwe derkevin. Ji bo aştî û demokrasiyê ji bo azadiya têkoşerên di zidanan de divê hemû Kurd dengê xwe bidin HDP’ê. “
Endama Rêveberiya Yekîtiya Êzidiyan a Herêma Efrînê Suad Hiso jî got: “Divê êdî dîktatoriya Erdogan bê hilweşandin. Ji bo ev dîktatoriya bê hilweşandin û aramiya hemû gelên ku li Tikriyê dijîn divê hemû kes dengê xwe dibin HDP’ê.”…JINNEWS
