Bi sedan welatiyên Girê Spî û navçeyên Eyn Îsa, Silûk sêyemîn salvegera rizgarkirina Girê Sipî ji dagirkeriya DAIŞ’ê bi şahiyekê pîroz kirin. Pîrozbahiyê de li ser navê sazî û rêveberiyan axaftin hatin kirin û bang li pêkhateyan hat kirin ku yekîtî û piştgiriya xwe xurt bikin.
Şêniyên Kantona Girê Spî li qada Meclîsa Sivîl a bajêr bi şahiyekê salvegera 3’yemîn a rizgarkirina Girê Spî pîroz kirin.
Bi sedan şêniyên Girê Spî û navçeyên Eyn Îsa, Silûk ji bo pîrozkirina 3’yemîn salvegera rizgarkirina bajêr li qada meclîsê ya Girê Spî ku bi wêneyên şehîdan û alên YPG’ê YPJ’ê û hêzên QSD’ê hati bû xemlandin, kom bûn.
Şandeya Rêveberiya Xweser a Kantona Kobanê tevlî şahiyê bû. Di şahiyê de li ser navê sazî û rêveberiyan axaftin hatin kirin.
Şêwirmendê Hevserokê Meclîsa Kantona Girê Spî Xelîl Ebdulkerîm axivî û spasiya hemî hêzên ku herêm rizgar kirine kir.
Ebdulkerîn di berdewama axaftina xwe de anî ziman ku bi saya xwîna şehîdan û bi vîna jina azad jiyaneke bi rûmet û aram dijîn û ji bo bi dawîkirina aloziya Sûriyê banga danûstandinê li hemî pêkhateyên Sûriyê kir.
Fermendarê YPG’ê Ebû Mazlûm jî axivî û got: “Em bostek axa welatê xwe bernadin û heta rizgarkirina tevahiya Sûriyê ji DAIŞ‘ê em ê tekoşîn bikin”.
Hevserokê Meclîsa Rêveber a Kantona Kobanê Enwer Muslim jî di pîrozbahiyê de axivî û bang li hemû pêkhateyên herêma Girê Spî kir ku beşdarî avakirina civakeke demokratîk û hevbeş bibin û ji bo yekîtiya Sûriyê li dora saziyên xwe yên sivîl, leşkerî û siyasî kom bibin û li hember planên dewleta Tirk ên li dijî herêmê bisekinin.
Endamê Partiya Sûriya Pêşerojê Kedîm Ibrahîm salvegera rizgarkirina herêmê li şêniyan pîroz kir û bang li hemû pêkhateyên Sûriyê kir ki ji bo yekîtiya Sûriyê hemî tevlî danûstandinan bibin.
Piştî bi dawîbûna axaftinan, komên çand û huner ên bajêr şanoyek bi navê (Biratiya Gelan) pêşkeş kirin. Her wiha şahî bi gerandina govendê bi dawî bû…ANHA