Welatiyên navçeya Eyn Îsa û gund û bajarokên derdorê berê xwe didin bazara Eyn Îsa û hemû pêdiviyên xwe ji vê bazarê peyda dikin. Bi taybet ji ber rewşa ewlehî û aramiya li herêmê, bazara Eyn Îsa jî geş buye.
Ji ber buhaya baş û peydabûna madeyên cûda welatî zêdetir berê xwe didin bazara Eyn Îsa. Di bazarê de dikanên cûr be cûr ên cilûbergan, pêdiviyên malê û xwarinê tên peyda kirin.
Di bazarê de bêtirî 110 dikan hatine vekirin û li rex wan di kolanên teng ên bazarê de jî gelek firoşkar û dikanên din hene.
Di encama xebatên Komîteya Çavdêrî û Zimhêrê ya girêdayî Rêveberiya Xweser di van demên dawî de buhayên pêdiviyan jî gelekî erzan bûne, bi taybetî piştî ku piraniya pêdiviyan ji bajarên Minbic û Reqayê tên wergirtin.
Yek ji sedemên geşbûna aborî li navçeya Eyn Îsa li gorî rêveberan ew e ku ewlehî û aramî li giştî herêmê serwer e. Navçeya Eyn Îsa yek ji herêmên ku hejmara welatiyan têde zêde bûye. Bi taybetî hejmareke zêde ya koçberan berê xwe dane vê herêmê.
Girêdayî mijarê welatiyê bi navê Îsmaîl El-Ebid ê ji gundê El-Ursî ya gundewarê navçeya Eyn Îsa diyar kir ku pêşbirkiya di navbera bazirganên navçeyê de bandoreke erênî li buhaya madeyan kir û wiha got: “Hemû pêdivî û pêwîstiyên welatiyan di bazarê de bi buhayeke baş tên peydakirin. Bi saya vê bazarê êdî em ne mecbûr in biçin bajarên weke Minbic, Kobanê û Reqayê û pêdiviyên xwe ji van bajaran peyda bikin.”
Dikandarekî bi navê Hilal El-Mihemed destnîşan kir ku buhaya pêdiviyan hêdî hêdî erzan bûn û êdî her tişt di vê bazarê de tên peydakirin. Her wiha di aliyê sebzeyê de jî li herêmê sîstema xwetêrkirinê pêk tê…ANHA
Bazara Eyn Îsa geş buye
