Erdogan ji bo hemû rojhilatanavîn xeter e

Salih Gedo diyar kir ku dewleta tirk a dagirker li bakur û başûrê Kurdistanê êrîşî vîna gelê Kurd dike, gefan li rojavayê Kurdistanê dike û got, “Li dijî wan êrîşan pêwîst e dewletên navneteweyî êdî ji Erdogan re bibêjin bese.”
Sekrêterê Partiya Çepgir a Kurd Salih Gedo derbarê êrîş û tehdîtên dewleta tirk de ji ANHA’yê re axivî û destnîşan kir ku Erdogan ji bo Rojhilata Navîn jî xetere û pêwîst e hemû hêz li dijî dîktatoriya Erdogan rawestin.
Salih Gedo bal kişand ser êrîşên dewleta Tirk ên li ser axa başûrê Kurdistanê û wiha got: “Dewleta Tirk a dagiker êrîşên xwe li ser axa Kurdistanê xurt kirine. Armanca wan deskeftî û şikandina vîna gelê kurd e. Êrîşên li ser başûrê Kurdistanê diyar dike ku Erdogan dixwaze di hilbijartinên 24 Hezîranê de bi ser bikeve. Bêguman projeya hikumeta AKP’ê derbarê vegerandina Dewleta Osmanî de jî heye. Li dijî êrîşên li ser başûrê Kurdistanê bêdengiya dewletên navneteweyî berdewam dike. Pêwîst e dewleta Iraqê li dijî dagirkeriya dewleta Tirk ya li dijî axa Iraqê bisekine.”
Salih Gedo li ser bêdengiya dewletên navnetewî wiha got, “Ev bedengiya dewletên navnetewî li dijî êrîşên dagirkeriya dewleta tirk diyar dike ku di nava planê de ne.Çawa li Efrînê de li hev kirin û li hember êrîşên hovanê bedeng bûn li Başûrê Kurdistanê jî bê deng dimînin. Heke dewletên navnetewî bêdengiya xwe li êrîşên dagirkeriya dewleta tirk li ser Minbic, Efrîn û başûrê Kurdistanê berdewam bikin wê li Rojhilatanavîn rê li pêşiya pisgirekên nû vebin. ”
Gedo wiha dewam kir: “Beriya êrîşên li ser Efrînê Erdogan di nava êrîşên li ser Kerkûkê de cih girt. Niha jî dixwazin hemû axa başûrê Kurdistanê dagir bikin. Ev hemû êrîş bi hev ve giredayî ne û yek armanca wan heye ku şikandina vîna gelê kurd e. “
Salih Gedo diyar kir ku di hilbijartinên 24’ê Hezîranê de têkçûna Erdogan wê ji bo hemû gelan taybet gelên Rojhilata Navîn bibe nefesek û wiha got, “Dîktatorî û rejîma faşîst dê li pêşiya îrade û yêkitiya gelan têk here. Di nav gelê li Tirkiyê de jî hêdî hêdî dengekî serhildanê derdikeve. Ji ber ku êdî ew jî dîktatoriya Erdogan qebûl nakin. Beşeke mezin a gelê Tirkiyê ji faşîzma Erdogan re dibêje na. Em bawer in ku Erdogan wê têk biçe û gelê kurd û yên gelên Rojhilata Navîn nefesekê bistînin.”