Rûspiyên êl û eşîrên Kurdan ên kantona Kobanê bang li gelê Kurd û hêzên azadîxwaz ên Bakurê Kurdistanê û Tirkiyê kirin ku di hilbijartinên 24’ê hizêranê de dengên xwe bidin Partiya Gelan a Demokratîk HDP’ê û bi derewên Erdogan neyên xapandin.
Derbarê hilbijarinên 24’ê Hizêranê yên li Tirkiye û bakurê Kurdistanê de, rûspiyên êl û eşîrên Kurdan ên kantona Kobanê bang li gelê Kurd ê hêzên demokartîk kirin ku dengê xwe bidin HDP’ê.
Rûspiyê eşîra Kêtikan a Kobanê Muslim Hesen wiha got: “Divê gelê Kurd li Bakurê Kurdistanê îradeya xwe di 24’ê Hizêran de hilbijêre û divê gelê me li hemberî komployên li dijî wê tên meşandin haydar be. Dîroka hikûmeta Tirkiyê bi komkujî û tunekirina gelê Kurd dagirtî ye û herî dawî dagirkirina bajarê aştiyê Efrînê li ber çavên her kesî ye.”
Hesen bang li gelê Kurd li Bakurê Kurdistanê kir ku di hilbijartinan de bi daxuyaniyên Erdogan neyên xapandin û got: “Siyasetên Erdogan ên dijberiya gelê Kurd eşkere ne û nîşana vê yekê jî ew e ku nûnerê gelê Kurd yê HDP’ê Selaheddîn Demîrtaş hê jî digirtîgehê de ye.”
Rûspiyê eşîra Bîcan li kantona Kobanê û endamê Komîteya Lihevanînê ya bilind li herêma Firatê Bozan Muxtar jî diyar kir ku Erdogan hewl dide di van hilbijartinan de bi serkeve û diktatoriya xwe hê kûrtir bike.
Muxtar destnîşan kir Tirkiye di nava qeyraneke mezin de bû û Erdogan jî li ber têk çûnê bû lewra jî biryara hilbijartina pêşwext girt ku desthilatiya xwe li ser lingan bigire.
Rûspiyê eşîra Bîcan bang li gelê Kurd û hemû pêkhateyên azadîxwaz û demokrasîxwaz ên li Bakurê Kurdistanê û Tirkiyê kir ku di hilbijartinên 24’ê Hizêranê de dengên xwe bidin HDP’ê…ANHA
Dengê xwe bidin HDP’ê, bi derewên Erdogan neyên xapandin
