Li navçeya Tirbespiyê ya kantona Qamişlo, lingê sereke ya aboriya civakê koperatîf e. Koperatîf di gel ku têkiliyên civakê xurt dike, jêdera sereke ya gelek malbatan e. Rola jinan di avakirin û pêşxistina koperatîfan de sereke ye.
Li navçeya Tirbespiyê ya kantona Qamişlo, ji destpêka ku sîstema komînal hatiye rûniştandin ve şêniyên navçeyê aboriya xwe ya civakî bi koperatîfan pêşdixin.
Li navçeyên Tirbespiyê û Til Hemîsê bi beşdarbûna 600 endamî 19 koperatîfên çandiniyê bi 17 hezar domin erd hatin avakirin.
Piştî ku ev koperatîf bi ser ketin, şêniyên gundan jî ev terûbe pêk anîn. Di vê çarçoveyê de, du koperatîfên sewaldariyê hatin vekirin. Yek li gundê Mizgeftê û ya din li gundê Girê Mergê.
Di koperatîfa li gundê Mizgeftê de 82 kes û ya gundê Girê Mergê jî 11 kes cih digirin. Li aliyekî din jî bi beşdarbûna 14 endam û 3 karkeran dikana firotina mirîşkan bi rengê koperatîf hate avakirin.
Derbarê koperatîfan de, berpirsyarê koperatîfên navçeya Tirbespiyê Mihemed Emîn Remedan El-Mihemed diyar kir ku armanca wan a sereke ji koperatîfan, belavkirina çanda bi hev re jiyankirinê û rê girtina li ber keysbaziyê ye.
Mihemed Emîn, destnîşan kir ku di du salên derbasbûyî de berhemên koperatîfan pir baş bû û anî ziman ku îsal barana kêm bandoreke neyinî li ser berhemdayîna koperatîfên çandiniyê kir.
Derbarê mekanîzmeya alîkardayîna ji bo koperatîfan Mihemed Emîn got,” Mala Kooperatîfan a navçeya Tirbespiyê destekê dide her kooperatîfan, bêyî ku destwerdana di biryarên wan de bike, ji ber ku bi kooperatîfan civakeke azad ava dibe.”
DI KOOPERATÎFAN DE ROLA JIN
Di avakirin û pêşxistina koperatîfan de rola jinan sereke ye. Di vê çarçovê de kooperatîfên taybet ên jinan hatin avakirin.
Jinan, kooperatîfa Înanna ya çêkirina mûnê, 3 koperatîfên çandiniyê li xeta Alya û Sinceq ava kirin. Di her sê koperatîfan de 6 hezar domin erd hate çandin û 40 jin tê de cih girtin.
Rêvebera Aboriya Jin a navçeya Tirbespiyê Behîra Îbrahîm da zanîn ku jin roleke sereke di pêşxistina aboriya xweser de dilîze û got, “koperatîf jêdera aboriya jinê ye.”
Behîra Îbrahîm, têkildarî plansaziya koperatîfên jinan, diyar kir ku di demên pêş de wê li gundê Hilwa firneyek bi beşdarbûna 11 jinan were vekirin, her wiha kargeha madeyên paqijiyê û dikaneke cilan li gundê Maşûq, û dikana firotina zebzeyan li Til Marûf bêne vekirin…ANHA
