Dayîkên şehîdan û saziyên sîvîl yên herêma Cizîrê banga rawestandina kiryarên PDK`ê kirin û gotin “Dijminê me Kurdan yek e, divê şerê birakujiyê nebe.”
Bertekên li dijî hewldanên şerê birakujiyê li Başûrê Kurdistanê, roj bi roj pirtir dibin.
QAMIŞLO
Di vê çarçoveyê de li bajarê Qamişlo dayîkên şehîdan çalakiyek li dar xistin.
Çalakî li Goristana Şehîd Delîl Sarûxan ya bajêr li dar ket. Di çalakiyê de dayîka şehîd Tolhildan, Rojîn Axa bang li gelê Kurd kir ku nehêlin şerê birakujiyê bibe û got, “Welatê me li ber çavan talan dibe, divê em bibin yek da em parastina welatê xwe bikin.”
Dayîka şehîd Yûsiv Nebî, Hefîfa Îbrahîm jî banga yekîtiyê li tevayiya Kurdan kir.
Herwiha dayîka bi navê Henîfa Hesen jî da zanîn ku dijminê Kurdan yek e û got, “Em dibêjin bila şerê birakujiyê nebe. Em bang li Mesûd Barzanî dikin; bila van plan û lîstikan li ser serê Kurdan çêneke. Bila tevgera xwe ya li Herêmên Parastinê yên Medya rawestîne û baregehan ava neke.”
TIRBESPIYÊ
Dayîkên şehîdan li navçeya Tirbespiyê li ber Saziya Malbatên Şehîdan kom bûn. Ji bo şermezarkirina tevgerên PDK`ê yên dawî li Herêmên Parastinê yên Medya desmalên serê xwe avêtin. Herwiha gotin, ev tevgerên PDK`ê komployeke bi fermana dewleta tirkî ye.
Avêtina desmalan çanda civakî ya kevnar e. Di şeran de dema jin desmalên serê xwe diavêjin şer radiweste.
Li Girkkê Legê, Çilaxa û Kobanê jî bi heman armancê çalaki hatin lidarxistin.