Huner bixwe helwesteke

Lîstikvana Kurd Şaî diyar kir ku Wezareta Rewşenbîrî û televziyonên Kurdî giringiyê nadin hunerê û got, “Huner bixwe helwesteke.”
Lîstikvana binavê Şaî Reza di sala 1992’an de li bajarê Silêmaniyê ji dayîk bûye. Şaî di zarokatiyê de dest bi hûnera zarîkirinê kiriye. Ji bo vê di temenê xwe yê zarokatiyê de tevlî lîstikên şanoyê dibe û pêngavek mezin di aliyê lîstikvaniya şanoyê de diavêje.
Şaî li gel vê hunera xwe ya zarîkirinê xwendina xwe ji bi awayeke serkeftî derbas dike. Beşa Şanoyê hem li peymangehê hem jî li zankoyê dixwîne.
Herwiha lîstikvan Şaî di gelek rêze film û filmên sînemayî yên Kurdî de jî lîstiye. Ji van filmane di filmê sînemayê yê ‘Evîndar bi hevre dimirin’de jî lîyîstiye.
Lîstikvan Şaî di derbarê rola jinan ya di hûnera zarîkirin (texlîtkirin) a li Başûrê Kurdistanê de axivî û diyar kir ku beşdariya jinan a di hunerê de li gorî dema berê zêdetire û got; “Hinek car zilam rola jinan dilîzin. Lê, niha herçend hejmara xwe kêm bin jî êdî jin jî berê xwe didin vê qada hunerê. Hê jî civak tam ne hatiye wê astê ku hebûna jinan a di vê qadê bipejirîne.”
Şaî balkişand ser astengiyên di dema karkirinê de derdikevin pêş wan û wiha pêde çû; “Wek her jinek din, astengî li ber karê min jî çêbûne. Lê ne hatiye wê astê ku bandoreke zehf mezin li min bike. Baweriya min bi jinan heye ku hemû astengiyan derbas bikin. Hûner bi xwe helwesteke. Pêwîste civak û rastiya civakê bigre berçavan. Huner jiyana mine.”
Di dawiyê de jî lîstikvan Şaî wezareta Rewşenbîrî ya Hikumeta Herêma Kurdistanê û televziyonên Kurdî rexne kir û got; “Wezareta rewşenbîrî û televziyonên Kurdî giringiyê nadin hunerê. Mixabin ev yek jî bandoreke neyînî li berhemên hunerî bikin.”…ROJNEWS