Derhênerê kurd ê ji rojavayê Kurdistanê, Telal Dêrikî di Mîhrîcana Fîlman a Krakovê de di beşa belgefîman de bi fîlmê xwe yê li ser zarokên di nava şîdet û kuştina DAIŞ´ê de tên mezinkirin ê bi navê ‘Ji Bav û Kuran’, Xelata Qiloçê Zêrîn wergirt.
Di belgefîlmê de Telal Dêrikî li Sûriyê bi kamerayê çûye nava DAIŞ´iyan û xwe weke alîgirê wan nîşan daye, hevaltiya wan dike. Lewma kariye here meydanên şer û rahênanên wan ên leşkerî bi kamera tomar bike.
Komîsyona Nirxandina Mîhrîcana 58´emîn Mîhrîcana Belgefilman a Krakovê, ji ber vî karê serkeftî, derhênerê kurd weke kesekî bêtirs wiha pênase kir: “Di nava cîhaneke dirinde de mirovekî çavnetirs.”
Di 58´emîn mîhrîcanê de wekî din belgefîlmeke din a ji Kurdistanê jî hat pêşkeşkirin. Fîlmê derhêner Hogir Hirorî yê bi navê “Deminer” (Hilkerê Mayinan) ku serpêhatî û lehengiya pêşmergeyê şehîd, Faxir nîşan dide, di mîhrîcanê de hate pêşandan.
Ev fîlm jî ji aliyê temaşevanan ve bi başî hate nirxandin. Piştî pêşandan, der barê fîlmê de ji kesên amade, xwendekaran re minaqeşeyeke hate pêşkeşkirin.
Juriyê der barê fîlmê Telal Dêrikî got ku ew gelekî behsa DAIŞ´ê dikin lê qet xwe nagihînin û derhêner xwe gihandiye wê dinyayê û bi zimanekî derasayî yê sînemayê kariye trajediya wan zarokan vebêje.
Di mîhrîcanê de wekî din xelata Ejderê Ejderan (ejder nîşaneke bajarê Krakovê ne) ji derhêner Sergei Loznitsa re çû ji ber alîkariya wê ya di pêşxistina belgefilman di asta cihanî de…KRAKOV
Xelata Qiloçê Zêrîn dan derhênerê kurd
