Hevserokê Yekîtiya Oldaran a Herêma Cizîrê Mele Mihemed Xerzî, diyar kir kesên ku olê ji bo berjewendiyên desthilatdariyê bikartînin wateya meha Remezanê li gor xwe guherîne.
Hevserokê Yekîtiya Oldaran a Herêma Cizîrê Mihemed Xerzî, li ser giringî û wateya meha Remezanê axivî û diyar kir ku mirov di meha Remezanê de nêzîkî xwestekên xuda dibe. Xwestekên xuda jî ji bo mirov ewe ku bi wekhevî, edaletî û heskirin bijîn. Cudahiya mirovan ji hev nebe. Çi netew, çi bawerî û çi mirov be divê xwedî maf û wekheviyê be.
Mele Xerzî balkişand ser rewşa cîhana Îslamê û anî ziman ku di roja îro de misilman dûrî wateya meha Remezanê bûne û got; “Tenê hersalê mehekî xwe dûrî xwarinê dikin û dibêjin elhemdûlîlah me rojiya xwe girt û xilas. Wek barekî li milê xwe dibînin. Lê heqîqeta rojiyê ne ev e. Di temamî îbadetên ku Îslam li ser disekine de, çawa mirov dikare xwe sinor bike û perwerde bike.”
Mele Xerzî destnîşan kir ku ev hezar û çarsed sal in hişê misilmanan li serê wa venegeriya ye û wiha got; “Niha çekên pir giran ku kesek dikare di rojekî de bi sedhezaran kes bikuje ketiye nava gelê misilman. Em dibînin çanda misilmanan û ragihandina misilmanan yek daxuyaniyek ku nêrînekî biratî, wekhevî û aştî di nav de hebe ranagihîne.”
Mele Xerzî diyar kir ku wan dixwest Remezana îsal di nava cîhana misilmanan de wekhevî û aştî hebe û got; “Me dixwest misilman li hev rûnin û li ser pirsgirêkan bi wekhevî û aştîyane li hevbikin. Lê mixabin ev nebû.”
Mele Xerzî dagirkirina Efrînê mînak da û wiha axivî; “Li gelek mizgeftên Tirkan meleyan Qur’an dixwendin û ji bo dagirkirina Efrînê fitwe didan. Melayên wan ji bo dagirkirinê cilên leşkeri li xwe dikirin, diçûn ser sinor û dua dikirin. Ev dide nişandan ku misilman çiqas dûrî olê xwe ketine û ne dîndarin. Mafyayên heşîş û efyonê van karan nakin. Van kesan bi fetweyên xwe karên qirêj kirin. Van kesên wisanmeha Remezanê li gor mirovên xirab guherîn.”…ANHA
Divê cejn bibe wesîla heskirin û wekheviyê
