Partiya Aştiya Demokratîk a Kurdistanê û Partiya Demokratîk a Kurdên Sûriyê PDKS’ê bi daxuyaniyên cûda bang li hikûmetên Hewlêr û Bexdayê kirin ku bi berpirsyariyên xwe rabin û li dijî dagirkeriya artêşa Tirkiyê li Başûrê Kurdistanê tevbigerin. Her wiha bang li hemû aliyên Kurdî kirin ku kongreya netewî ya Kurdistanê di demeke lezgîn de lidar bixin.
Di çarçoveya helwestên li dijî dagirkeriya artêşa Tirk ya li ser Başûrê Kurdistanê, Partiya Aştiya Demokratîk a Kurdistanê û Partiya Demokratîk a Kurdên Sûriyê PDKS’ê daxuyanî dan.
Her du partiyan di daxuyaniyên xwe de behsa destwerdanên dewleta Tirk li dewletên cîran kirin û dane zanîn ku Tirkiye hewl dide impratoriya Osmaniyan ji nû ve vejîne û Erdogan weke sultanê nû hilbijêre.
Di daxuyaniyan de hate gotin wê Qendîl bibe goristana dagirkeran.
Di daxuyaniyan de hate gotin ku dewleta Tirk rêbazên herî qirêj li dijî projeya demokratîk a welatiyên herêmê didan meşandin û alîkariyeke mezin bi komên terorîst re dikir da ku projeya welatiyan a demokrasiyê têk bibe. Piştî ku ev planên dewleta Tirk bi saya fedekariya şervanên Azadiyê hatin têkşikandin, niha Tirkiye rasterast herêmên Kurdan li dewletên cîran dagir dike û di dagirkeriya xwe de hemû pîvan û yasayên navnetewî binpê dike.
Di daxuyaniyan de hate got ku hikûmeta AKP’ê û serkêşê wê Erdogan ji destpêka aloziya Sûriyê ve destwerdana Sûriyê kir û alozî girantir kir û alîkariyeke mezin bi komên çete yên weke Cebhet El-Nusra û DAIŞ’ê re kir.
Di dawiya herdu daxuyaniyan de kiryarên Tirkiyê li dijî gelên herêmê hatin şermezarkirin. Her wiha bang li civaka navnetewî kirin ku li dijî van destdirêjiyên Tirkiyê tevbigerin.
Di daxuyaniyan de her wiha bang li hemû aliyên siyasî yên Kurdî yên herçar parçeyên Kurdistanê hate kirin ku yekîtiya xwe ava bikin û bi yek helwestê li dijî destdirêjiyên Tirkiyê li ber xwe bidin.
Divê Kurd li dijî dagirkeriyê bibin yek
