Bi nêzîkbûna Cejna Remezanê sûkên gelêrî yên gundewarên rojhilatê Dêrzorê qerebalix dibe. Sûk di serê sibehê de heta saetên dawiya şevê tijî dibe.
Di hefteya dawî a meha remezanê de, şênî amadekariya cejnê dikin. Cilên cejnê dikirin û hemû cureyê kulîçeyê cejnê weke kevneşopiyekê çêdikin.
Sûka El-Cizrat bi biharatên xwe yên cur bi cur navdar e. Sûk bi taybet di cejnê de dibe meqseda şêniyan. Jin ji bo çêkirina kulîçeyê diçin sûkê û pêdiviyên wê dikirin.
Welatiyê bi navê Im Rebî ji şêniyên El-meyadîn a li El-Cizrat yê girêdayî gundewarên Dêra zor dimîne got, “ez pêdiviyên cejnê ji sûka El-Cizrat dikirim. Buhaya madeyan li gorî salên borî pir kêm bûye.”
Im Rebîi spasiya hêzên QSD’ê kir ji ber ku herêmên wan ji dagirkeriya DAIŞ’ê rizgarkirin û bi saya wan ew cejn bi aramî pîroz dikin.
Şêraniya cejanê cihê kêfxweşî û şadiya zarokan e, ruxmî rewşa aborî ya dijwar lê malbat tevdîra şêraniya cejnê dikin.
Yunis El-Yunis xwediyê dikana frotina cilên zarokan diyar kir ku bi dawîbûna remezanê re, ji ber frotina cilan a zêde karê wan baş bûye.
LI TIL HEMÎS AMADEKARIYÊ CEJNÊ
Ji aliyê din ve Şêniyên navçeya Til Hemîs a kantona Qamişlo amadekariyên Cejna Remezanê dikin.
Bi rasthatina Cejna Remezanê re sûk bi pêdiviyên cejnê tijî bûye. Şênî bi kêfxweşî xwe ji bo cejnê re amade dikin.
Macid El-Naîm diyar kir ku şêniyên navçeyê zêde amadekariyên cejnê dikin. El-Naîm hêviya aştî ji hemû herêman re di vê cejnê de xwest.
Welatiyê bi navê Seyah El-Xelef destnîşan kir ku piştî herêm hate rizgarkirin şênî bi kêfxwî û azadî cejnê pîroz dikin.
EL KERAMÊ XWE JI CEJNÊ RE AMADE DIKE
Piştî rizgarkirina herêma El-Keramê ya girêdayî Reqayê, şêniyên herêmê bi kêfxweşî cejna Remezanê pêşwazî dikin û aştî û aramiyê ji hemû herêmên Sûriyê re dixwazin.
Cejna Remezanê nêz dibe û bazarên herêmê bi hemî pêdiviyên cejnê tijî bûne. Şêniyên El-Keramê bi kêfxweşî û azad dê cejnê pîroz bikin.
Berberê bi navê Ehmed El-Casim got: “Di dema DAIŞ’ê de min dikana xwe girt, ji ber ku DAIŞ nedihişt kesek bê gel berber û rih û pora xwe qutbike. Lê piştî rizgarkirina herêmê, jiyan vegeriya wek berê û em dikanên xwe bi azad vedikin”.
Abdulrezaq Hesen xwediyê dikana cilan diyar kir ku neçar diman ku cilên çeteyên DAIŞ`ê destûr didin bifroşin, li dikanên xwe difrotin û ew niha azad karê xwe berdewam dikin û kîjan reng û modeya cilan dixwazin difroşin.
Abdulrezaq diyar kir ku herêma wan bi saya berxwedana YPJ/YPG`ê û hêzên QSD’ê rizgar bû û hêviya rizgarkirina hemî herêmên Sûriyê xwest
Şêniyên bajarê Qamişlo jî xwe ji bo cejna Remezanê amade dikin. Îsal rewşa cejnê ne mîna salin din e. Qerebalixa zêde li sûkên bajar de heye. Şêniyên bajêr bi awayekî zêde pêdiviyên cejnê dikirin.
Şêniyên bajarê Qamişlo weke hemû bajarên din xwe ji bo cejna Remezanê amade dike. Şêniyên wê û xwediyên dikanan dibêjin ku îsal pêwîstiyêna wan ji salên berê erzantirin. Her wiha pêdiviyên wan bi awayekî zêdetir ji salên berê tên peyda kirin û gotin ku ev cejn ji cejnên salên berê baştire…ANHA
