Namzetê Serokkomariyê Selaheddîn Demîrtaş ji bo Erdogan got, “dema wî zêde nemaye” û destnîşan kir ku guhertin şert e û ev jî nêz e. Demîrtaş diyar kir, dagirkirina Efrînê û tifaqa bi MHP’ê re wê tercîha Kurdên AKP’yî jî biguherîne.
Namzetê Serokkomariyê yê HDP’ê Selaheddîn Demîtaş bi rêya parêzerên xwe bersiv da pirsên rojnameya Italî Corrîere della Sera.
Demîrtaş li ser pêvajoya kampanyayê got, “Mesele ne ew e ku tenê nikarim dengê xwe bigihînim û nikaribim derkevim ber gel. Ji namzetên din ji hêla reveberina kampanyayê ve bi dezavantaj im. Lê min hay ji vê hebû û bûme namzet. Ji bo min, ji bo Kurdan, ji bo hemû çewisandiyên vî welatî ti tişt jixwe heta niha ne hêsan bû. Ango têra xwe bi tecrûbe me, heta roja hilbijartinê li gel astengiyên fizîkî yên girtîgehê jî heta ku ji destê min were ez ê kapmanyaya xwe rê ve bibim.”
JI BO ERDOGAN KETINÊ DEST PÊ KIR
Li ser pirsa, ‘Erdogan ji te re terorîst dibêje, tu çi dibêjî?’, Demîtaş got, “Erdogan jî zane ku ez ne terorîst im. Derdê wî ew e ku bi kampanyayeke lincê ya li ser min dixwaze perikên xwe binepixîne. Lê êdî çi jî bike nikare wan perikên xwe binepixîne. Ji bo Erdogan ketinê ji mêj ve dest pê kiriye.”
Li ser pirsa ‘Heke nemînî tûra duyan hilbijêrên wî wê çi bikin’ Demîrtaş got, “Ez dixwazim bimînim tûra duyan û ji bo vê dixebitim. Hilbijêrên min jî destekê didine min. Lê wiha bibêjim; HDP’yî bi çarçoweya rêgezên xwe wê tercîha xwe li ser demokrasiyê bikin.”
Demîrtaş got: “Ji her demê zêdetir bi hêvî me. Dema ku hêviya we nema divê hûn dev ji siyasetê biqerin. Li gel ku rewşa ku hikûmetê li welêt çêkiriye ji, dema ku mirov li gel dinere, ez dikarim bibêjim, ti sedemek tine ku em hêvîşikestî bibin. Guherînek şert û ev pir nêz e.”
