Rêveberiya Xweseriya Demokratîk a kantona Efrînê bi daxuyaniyekê bang li Yekîtiya Ewropa, Konseya Bilind a Koçberan û rêxistinên navnetewî kir ku bi erka xwe rabin û berpirsyariya xwe ya ji bo gelê Efrînê yê ji ber êrîşên dagirkeriya Tirk koçber bûne bi cih bînin.
Rêveberiya Xweseriya Demokratîk a kantona Efrînê bang li Yekîtiya Ewropa, Konseya Bilind a Koçberan û hemû rêxistinên navdewletî kir ku erka xwe ya hemberî şêniyên Efrînê yên li Şehbayê dimînin bi cih bînin û dawî li dagirkeriya Tirk ya li Efrînê bînin.
Rêveberiya Xweseriya Demokratîk a Efrînê derbarê mijarê de daxuyaniyek li Kampa Berxwedan da. Daxuyanî bi beşdarbûna nûnerên Desteyên Rêveberiya Xweseriya Demokratîk a Efrînê, rêveberên komînan û endamên meclîsan û endamên Kongreya Star hate xwendin.
Daxuyanî wihaye:
“Piştî ku dewleta Tirk a dagirker û çeteyên wê yên terorist êrîşê Efrînê kirin welatiyên sivîl berê xwe dan kantona Şehbayê. Dewleta Tirk û çeteyên wê li dijî sivîlan hemû cûreyên çekan bikar anîn û ew neçar kirin ku ji warê xwe derkevin.
Welatiyan li kantona Şebayê ku derfetên herî kêm ê jiyanê lê nayê peydakirin, jiyana xwe dewam kirin. Di xaniyên hilweşiyayî, mayînkirî û kampan de bi cih bûn. Kampên li Şehbayê tu piştgiriyê ji tu rêxistinan, an jî ji tu aliyên navdewletî wernagirin. Lê belê bi derfetên xwe yên herî kêm xwe ji sermê û germê diparêzin.
Komplogerên ku bûn sedema derbederkirina welatiyên Efrînê, hê jî pîlanên xwe yên wan jihev qutkirin û derbederkirinê didomînin. Di riya şerê taybet re tirsê di nava welatiyan belav dikin îdayên ji rastiyê dûr da ku berxwedan û tekoşîna wan, her wiha helwesta welatiyan a berxwedanê têk bibin.
Çemberê rojanê li ser kantona Şehbayê hê zêdetir dikin, riyan digrin û rê nadin alavên jiyanî yên pêwîst derbasî herêmê bibin. Di encama van siyasetan de hejmarek welatiyên sivîl ku piraniya wan jin û zarok in jiyana xwe ji dest dan. Beranberî vê yekê rêxistinên mirovî, bêdeng in.
Lewma em bang li Yekîtiya Ewropa, Komseriya Bilind a Koçberan û hemû rêxistinên mirovî dikin ku destwerdanê bikin da ku erka xwe beranberî şêniyên Efrînê yên neçarî derketinê bûne, pêk bînin. Destê alîkariyê dirêjî wan bikin û riya wan ya vegera warên wan misoger bikin, her wiha dawî li dagirkeriya dewleta Tirk bînin.
