Mihemed Hebîb destnîşan kir ku divê gelê Kurd di vê pêvajoyê de li hemberî êrîşên dewleta Tirk bibe yek.
Endamê Komîteya Navendî ya Partiya Demokratîk a Kurd li Sûriyê-Rêxistina Kobanê Mihemed Hebîb êrîşên dewleta Tirk a dagirker ên li ser Kurdistanê nirxand.
Hebîb got: ˝Dewleta Tirk ji zûde destkeftiyên gelê Kurd û hebûna wan qebûl nake. Qendîl xaka Başûrê Kurdistanê ye û niha Tirkiye tehdîd dike ku êrîşî Qendîlê bike.˝
Hebîb diyar kir ku mafê dewleta Tirk tune ye ku êrîşî başûrê Kurdistanê bike, ew bi vê yekê dixwaze îradeya gelê Kurd bişkîne.
Hebîb diyar kir ku gelê Kurd li hemberî van êrîşan divê yekîtiya xwe çêbikin û Kurdên ku pişta xwe didin Tirkiyê divê werin ser hişê xwe û ji bo yekîtiya netewî bixebitin.
Hebîb wiha dewam kir: ˝Em weke partî dibînin ku eger em weke gelê Kurd lihev bikin û bi doza xwe bawer bin, em ti carî têk naçin û em ê bikarbin li hemberî dewleta Tirk derbikevin, eger yekîtiya gelê Kurd çênebe ew nikare biserbikeve˝.
Hebîb hedefa Erdogan ji êrîşa li ser Başûr û Rojavayê Kurdistanê wiha nirxand:˝ Erdogan di pêvajoya hilbijartinan de van tehdîdan dike û ji bo zêde deng bigre êrîşî Başûr û Rojavayê Kurdistanê dike. Divê gelên Tirkiyê bi vê yekê neyê xapandin. Erdogan di bin navê şerê li hemberî PKK`ê Efrîn dagirkir û bû sedema kuştin û koçberkirina bi hezaran ji şêniyên Efrînê.”
Endamê Komîteya Navendî ya Partiya Demokratîk a Kurd li Sûriyê-Rêxistina Kobanê Mihemed Hebîb di dawiya axaftina xwe de wiha got: “Dewleta Tirk îrade û hebûna gelê Kurd qebûl nake. Li her devere Kurd lê hene Tirkiye êrîşî wan dike û bi taybet di êrîşa li hemberî Qendîlê dixwazin îradeya gelê Kurd bişkîne. Divê Kurd ji her demê zêdetir yekîtiya xwe ava bikin.”…ANHA
Li dijî êrîşan Yekîtî pêwîste
