Çavdêrê siyasî Mehemed Emîn Pencewînî têkildarî hewldanên dewleta Tirk ya dagirkirina başûr axivî û diyar kir ku pêwîste Parlamentoya Herêma Kurdistanê û hemû aliyên siyasî yên kurd bibin yek, helwest nîşan bidin. Pêncewînîn got, “êrîşên Tirkiyê ne tenê li dijî PKK’ê ne, li dijî doza rewa ya Kurd e.”
Mehemed Emîn Pencewînî diyar kir ku armanca dewleta Tirk dagirkirina Kurdistanê ye û dema dagir kir bi hêsanî jê dernakeve, lewma pêwîste Parlamentoya Herêma Kurdistanê û hemû aliyên siyasî yên kurd bibin yek, helwest nîşan bidin.
Çavdêrê siyasî Mehemed Emîn Pencewînî têkildarî hewldanên dagirkeriyê ku Tirkiye li hemberî Başûrê Kurdistanê dimeşîne, axivî.
Mehemed Emîn Pencewînî bibîr xist ku dîrokek kevin a dagirkeriya Tirkiyê li Başûrê Kurdistanê heye û got: “Zêdetirî 15 baregehên leşkerî yên Tirkiyê li Başûrê Kurdistanê hene. Ev du sal e jî hêza xwe û saziyên xwe yên sîxurî di nava herêmê de zêde dike. Armanc jê ew e ku li Herêma Kurdistanê bicîh bibe û bi hêsanî jî dernakeve.”
ARMANC TEVAHIYA KURDISTANÊ YE
PÊncewînî da zanîn ku dîmenên leşkerên Tirk ku li gundên Başûr hatine kişandin û belavkirin, peyamekê didin û Tirkiye dixwaze bêje, “Me ev welat dagir kiriye û kesek nikare rêya me bigire.”
DIVÊ HELWESTÊ NÎŞAN BIDIN
Emîn PÊncewînî destnîşan kir ku êrîşên Tirkiyê ne tenê li dijî PKK’ê ne, li dijî doza rewa ya Kurd e, lewma divê hemû aliyên siyasî helwest nîşan bidin û wiha dewam kir: “Divê li hemberî dagirkeriyê Parlamentoya Herêma Kurdistanê bicive û helwesta xwe nîşan bide. Herwiha pêwîste helwesta hemû hêzên siyasî ên Kurdistanê hebe.”
Pencewînî, hêvî kir ku hewldanên dagirkeriyê yên Tirk hêzên siyasî yên Başûr di heman eniyê de bighijin hev û got: “Mixabin li Başûrê Kurdistanê di nava aliyên siyasî de ne wekheviyek mezin heye. Bila ev dagirkerî bibe derfetek ji bo yekîtiya nava aliyên siyasî û bi hevre daxwazê ji hêzên navnetewî bikin ku Tirkiye ji xaka Herêma Kurdistan bê derxistin, dawî li dagirkeriyê bê anîn.”…ROJNEWS
