Partiyên siyasî yên Helebê destnîşan kirin ku ji bo xelaskirina Sûriyê ji kirîzê pêwîste hemû aliyên Sûrî xwedî nêrîneke hevbeş bin û dest bidin hev. Partiyên siyasî gotin, “siyaseta dûrxistina aliyekî an pêkhateyekî Sûriyê aloziyê çareser nake.”Buroya Meclîsa Sûriya Demokratîk ya Helebê bi partiyên siyasî yên taxa Şêxmeqsûd re civiya. Di civînê de pêşketinên dawî hatin nirxandin.Civîn li avahiya MSD‘ê ya taxê hate lidarxistin. Nûnerên PYD‘ê, Hevbendiya Niştimanî û Partiya Sûriya Pêşerojê di civînê de amade bûn.Hevserokê Buroya Meclîsa MSD‘ê ya Helebê Mirî Şiblî geşedanên dawî yên li Sûriyê nirxand. Şiblî got, “Destwerdanên aliyên derve di karûbarên Sûriyê de bandoreke neyînî li ser gelê Sûriyê dike.”Şibilî, diyar kir ku rêbazên leşkerî çareseriyê pêşnaxe û got, “pêwîst aloziya Sûriyê bi rengekî siyasî were çareserkirin û gelê Sûriyê bêyî destwerdana derve çarenûsa xwe diyar bike. Armanc ji destwerdana derve parçakirina Sûriyê yê.”Mirî Şibilî, wiha dewam kir, “Tirkiye ji destpêka aloziya Sûriyê sînorê xwe ji koçberên Sûriyê re vekir da ku gelê wê bide koçberkirin. Paşê destwerda nava xaka Sûriyê. Herî dawî beşeke ji xaka Sûriyê dagirk kir û niha çavê wê li herêmên din e. Armanca Tirkiyê ew e ku îradeya gelê Sûriyê têk bibin.”Di dawiya civînê de, beşdaran jî nerînên xwe derbarê mijarê de anîn ziman û diyar kirin ku ji bo xelaskirina Sûriyê ji kirîzê pêwîste hemû aliyên Sûriyê xwedî nêrîneke hevbeş bin û bi hevre tevbigerin…ANHA
Divê gelên Suriyê bi hevre tevbigerin
