Eniya Demokratîk a Sûriyê piştî ku serdana xwe ya li bakurê Sûriyê bi dawî kir, civîneke çapemeniyê li dar xist.
Eniya Demokratîk a Sûriyê serdana xwe ya li Bakurê Sûriyê bi dawî kir. Eniyê ku li gel MSD‘ê, rewşenbîrên Suryan, Ereb û Kurd, hêzên siyasî yên Bakurê Sûriyê hevdîtin pêk anî, di derbarê encamên hevdîtinan de, civîneke çapemeniyê li Otêla Mîrland a bajarê Qamişlo li dar xist.
Sekretêrê Giştî yê Eniya Demokratîk a Sûriyê Mehmûd Mirî, Berdevka Eniyê Meys Kredî, endamê Eniya Demokratîk a Sûriyê Ebdulezîz Dawûd, Serokê Partiya Sûriya Siberojê û enedamê Eniya Demokarîk a Sûriyê Fewzî Teqyedîn, Serokê Partiya Aşîtî ya Niştimanî û endamê eniyê Hanî El-Xûrî di civînê de amade bûn.
Sekretêrê Giştî yê Eniya Demokratîk a Sûriyê Mehmûd Mirî axivî û bal kişand li ser rola neyinî ya hin aliyên ragihandinê di reşkirina tecrûbeya Rêveberiya Xweseriya Demokratîk de û got, “Ev yek ji amûrên ku nehişt em bi Rêveberiya Xweser re danûstandinan çêbikin. Lê piştre diyar bû ku ev tecrube roleke mezin di aramiya Bakurê Sûriyê û hevgirtina hemû gelan de leyîst. Aliyên ku îdîa dikirin ev tecrube Sûriyê parçe dike, derket ne rast e. Em hatin Qamişlo da ku hevdîtinan çêbikin û di mijara çareserkirina aloziya Sûriyê de bighêjin encamekê. Divyabû ku ev hevdîtin ji destpêka aloziya Sûriyê de hatiba çêkirin.”
Ebdulezîz Dawud jî anî ziman ku ew hewl didin hêzên derve yên ku dest li Sûriyê wer didin û bûne sedema kûrkirina aloziyê derxînin û diyar kir ku girîngiya danûstandinan ser rêgirtina li ber destwerdana hêzên derve û lidarxistina kongreyeke niştimanî Sûrî-Sûrî, tê de hemû aliyên Sûrî li ser maseyekê rûnên û çawaniya çareserkirina aloziyê nîqaş bikin bû.
Berdevka Eniya Demokratîk a Sûriyê Meys Kredî jî bal kişand li ser rola jinan di her qadên jiyanê de û diyar kir ku jin roleke pêşeng dilîze û hêvî kir ku hemû jinên Sûriyê jî roleke çalak û pêşek di civakê de bileyîzin…ANHA
