Dewleta Tirk ya dagirker û çeteyên wê piştî ku Efrîn dagirkirin yek ser dest bi qirkirin û paqijiya etnîkî kirin. Cihên dîrokî yên herêmê rûxandin û sazî hilweşandin û demografya herêmê diguherînin. Bi taybet cih û deverên pîroz yên Êzidiyên Efrînê jî wêran kirin.
Yekîtiya Êzidîyan a Efrînê kiryarên aratêşa Tirk a dagirker û çeteyên wê li ser gund, cih û navendên olî yên Êzidîyan şermerzar kirin. Êzidiyan bang li civaka navdewletî kirin ku li hember qirkirina civaka Êzidî helwestên xwe diyar bikin.Yekîtiya Êzidîyan derbarê êrîşên artêşa Tirk a dagirker û çeteyên wê li dijî Êzidîyên Efrînê daxuyaniyek dan. Daxuyanî li kampa Serdemê ya herêma Şehbayê ji aliyê Endamê yekîtiyê Esed Marok ve hate xwendin. Bi dehan şêniyên herêmê tevlî xwendina daxuyaniyê bûn.
Daxuyanî wiha ye:”Bi sedan salane ola Êzdiyan rastî êrîşên tunekirinê tê. êrîşa herî dijwar a ji bo tunekirina ola Êzdiyan di serdema dagirkeriya Osmaniyan de bû.
Mayîna ola Êzdî tê wetaya berdewama berxwedana li dijî dagirkeriyê. Ola Êzidî weke her tim bû hedefa dijminên gelê Kurd. Ji destpêka aloziya Sûriyê ya sala 2011’an ve û piştî valahiya rêveberî ya li herêmên Kurdî, Rêveberiya Xweseriya Demokratîk hate damezrandin ku cara yekemîn hebûna Êzdiyan û ola Êzidî nas dike. Welatiyên Êzidî bi vê yekê dest bi damezrandina komeleyên xwe yên Êzidî kirin û bi armanca perwerdekirina zarok û ciwanên xwe li ser bingehên rê û resmên ola Êzidî li gelek gundan dibistanên xwe vekirin.Bi destpêkirina êrîşa artêşa Tirk a dagirker li dijî herêma Efrînê komên çete yên girêdayî wê gefên kuştin û serjêkirinê li welatiyên Êzidî xwarin. Van komên çete eşkere radigihandin ku tişta li Şengalê dest pê kirine dê li Efrînê berdewam bikin. Çeteyan hemû mezar û deverên pîroz ên Êzidiyan li Efrînê teqandin û welatiyên Êzidî neçarî koçberiyê kirin û gelek ji welatiyên Êzidî neçar dikirin ku dest ji ola xwe berdin û beşdarî ola Îslamî bibin. Her wiha komên çete cilûbergên taybet bi aliyên îslamî yên radîkal li ser jinên Êzidî ferz kirin û li şûna çanda biratî û jiyana hevbeş çanda îslamiya radîkal belav dikin.”Yekîtiya Êzdiyan destnîşan kir ku revandina ciwanên Êzidî ji aliyên komên çete ve ji destpêka dagirkeriya artêşa Tirk a dagirker û komên çete yên girêdayî wê li herêma Efrînê bi awayekî rojane berdewam dike. Ciwanên Êzidî yên tên revandin rastî îşkenceyên dijwar tên. Her wiha bi hemû rêbazan hovîtiya xwe li ser welatiyan didin meşandin û mizgeftên xwe li gundên Êzidî ava dikin.“Em weke Yekîtiya Êzdiyan bang li civaka navnetewî û rêxistinên Mafên Mirovan dikin ku destwerdanê li Efrînê bikin û pêkhateya Êzidî ji qirkirinê biparêzin û rê li pêşiya kînên komên cîhadîst û dewleta Tirk bigirin.”
