Rêveberiya Sivîl a Demokratîk a Minbicê bi daxuyaniyekê diyar kir ku rêjîma Tirkiyê bi riya van gefên xwe yên li dijî Minbicê hewl dide aramî û ewlehiya li Minbicê û jiyana hevbeş û biratiya gelan têk bibe û got, “Emê aramiya li herêma xwe biparêzin.”
Girêdayî pêşketinên dawî yên li Minbicê de, Rêveberiya Sivîl a Demokratîk a herêma Minbicê daxuyaniyek da.
Daxuyanî ji aliyê hevserokê Meclîsa Rêveber a Rêveberiya Sivîl a Demokratîk a Minbicê Mihemed Xêr El-Şêxo ve li pêşiya avahiya rêveberiyê bi amadebûna endamên rêveberiyê, komîn û meclîsên herêmê hate xwendin.
Daxuyaniya Rêveberiyê wiha ye:
“Aramî û ewlehiya ku welatiyên me li Minbicê û gundewarê wê dijîn, ne li gorî berjewendiyên Osmaniyên Tirk in ku hewl didin axa Sûriyê dagir bikin.
Meclîsa Leşkerî ya Minbicê hêza tekane ye ku nûnertiya welatiyên bajarê Minbicê û gundewarê û hemû pêkhateyên wê dike û erka wê ye ku herêma xwe ji hemû êrîş û destdirêjiyan biparêzin. Ji ber ku ew nûnerê welatiyên Minbicê ye herêm ji destên çeteyên DAIŞ’ê ku alîkariya xwe ji Tirkiyê werdigirtin rizgar kirin û di vê derbarê de bi sedan şehîdên weke Feysel Ebû Leyla, Ednan Ebû Emced, Ebû Casim El-Begarî û Botan Turkmen dan.
Rêveberiya Sivîl a Demokratîk beriya ku hemleya rizgarkirina Minbicê dest pê bike hate damezrandin û rizgarkirina bajêr bi alîkariya welatiyên wê hate meşandin. Niha jî ew dikare rêveberiya Minbicê bike ji ber ku di dema borî de piştî hate rizgarkirin xebatên xwe bi riya meclîs û komîteyên cûda bi rêk û pêk meşandin. Pêdiviya welatiyên bajêr bi destwerdan û fermanên derve tune ye.
Divê dewleta Tirk ji van herêmên ku dagirkirine derbikeve û rê li pêşiya welatiyên van herêman were vekirin da ku xwe bi rêve bibin.
Em daxuyanî û gefxwarinên rêjîma Tirkiyê qebûl nakin. Rêjîma Tirkiyê bi van helwestên xwe hewl dide aramî û ewlehiya li Minbicê têk bibe û jiyana hevbeş û biratiya gelan li herêmê hilweşîne.
Em weke Rêveberiya Sivîl a Demokratîk em ê parastina aramî û ewlehiya li herêmê berdewam bikin û rewşa xizmetguzarî û jiyana hevbeş li herêmê pêş bixînin. Her wiha li ser bingeha edaleta civakî û beşdarbûna piralî derfet dê bêne peydakirin. Meclîsa Leşkerî ya Minbicê hêza tekane ye ku parastina ewlehiya welatiyan dike. Em bang li hemû welatiyên Minbicê yên penaber bûne dikin ku vegerin bajarê xwe û li ser bingeha hezkirin, aştî, geşbûn, ewlehî û aramiya hemûyan beşdarî avakirina herêma xwe bibin.”
Em ê aramiya li herêma xwe biparêzin
