Ji ber sedema êrîşên dagirkeriyê yên dewleta Tirk û çeteyên wê gelê Efrînê neçar ma ji Efrînê derkeve û li Şehbayê bi cih bibe. Bi armanca piştgiriyê Komîteya Aborî ya herêma Efrînê ji bo Efrîniyên li Şehbayê projeyên aborî pêş dixe.
Komîteya Aborî ya herêma Efrînê bi armanca destekdayîna ji bo100 malabtên Efrînî yên li Şehbayê re 28 projeyên aborî amade kiriye. Komîte her wiha ji bo vekirina kargeha qeşayê amadekariyan dike.
Bi êrîşên Artêşa Tirk a dagirker û çeteyên wî yên li ser Efrînê re, şêniyên Efrînê neçar man ji warê xwe derkevin û li kantona Şehbayê bi cih bibin. Komîteya Aborî ya herêma Efrînê bi armanca destekdayînê bi şêniyên Efrînê re, hejmareke proje dane destpêkirin.
Komîteya Aborî ya Efrînê ku ji 5 endaman, 2 ji Efrînê û 3 ji şehbayê pêk tê 10’ê Gulanê xebatên xwe dane destpêkirin. Komîteyê heta niha di nav 20 rojan de 20 daxwaznameyên projeyên aborî ji welatiyên Efrînê girtiye.
Proje ev in: vekirina dikanên firotina zebze û meywe, madeyên sotemeniyê, madeyên xwarinê, firotina cilan, firina hevîrgoştê, dikana sermîsankgeh, dikana şûştina û ûtîkirina cilan, dikana hesinkariyê û du kefîtîrî. Her wiha komîteya Aborî ji bo firehkirina dermanxaneyekê alîkarî daye.
Li gorî rayedarên Komîteyê piraniya projeyan dê li navçeyên Til-Rifet, gundên Fafîn, Til Qerah û Um El-Hoş werin vekirin.
Piştî nirxandina daxwaznemayan, Komîte li gorî derfetên Rêveberiya Xweser alîkariya madî ji welatiyan re pêşkeş dike. Her wiha welatî di serî her mehekê de pereyên qezenckirine ji Komîteyê re vedigerînin.
Di derbarê vê mijarê de endamê Komîteya A
borî Heysem Mela armancên Komîteyê daxuyakirin û got:”Insyatîfa Komîteyê weke deyndan,ji bo alîkariya şêniyê Efrînê ku bi darê zorê ji warê xwe derkrtine û ji bo tunekirina bêkariya li herêma Şehbayê re hat”.
Mela axaftina xwe wiha domand:” Ji ber ambargoya li ser herêmê, vekirina projeyên mezin zehmet e. Rexmî vê yekê jî bi beşdarbûna hejmarek malbat proje têne vekirin. Em dikarin bêjin ku zêdeyî 100 malbatî sûdê ji van projeyan digirin. Qezenciyên van projeyên dê li malbatan vegerin, li aliyekî din jî ev proje bê kariyê kêm dike.”
Mele di berdewama axaftina xwe de, anî ziman ku wekî komîte li gorî derferên di destê Rêveberiya Xweseriya Demokratîk niha ji bo vekirina kargeha qeşa ango bûz dixebite. Kargeha ji 7 odeyên berad ji bo depokirina zebze û mêweyan pêk tê.
Ji aliyê xwe ve welatiyê bi navê Mustefa Golîn diyar kir ku komîte alîkariya wî kiriye û wiha got:” Piştî dagirkirina Efrînê xisarên mezin li aboriya me ket, em spasiya insyatîfa komîteyê dikin. ANHA
