Girtiya siyasî ya Kurd Zeyneb Celaliyan hişyarî da rayedarên girtîgehê ger ku heya roja Şemiyê neşînin nexweşxaneyê, wê nerazîbûnek cûda nîşan bide.
Rewşa tenduristiya girtiya siyasî ya Kurd Zeyneb Celaliyan ku li Girtîgeha bajarê Xoy ya girêdayî parêzgeha Urmiyê ya Rojhilatê Kurdistanê dimîne pir xerabe. Celaliyan bi nexweşiyên giran ên weke êşa dil, îltihaba diranan, tarîbûna çav û çend nexweşiyên din êşê dikişîne. Rayedarên girtîgehê jî destûr nadin ku Celaliyan ji bo tedawiyê biçe nexweşxaneyên derveyî girtîgehê.
Zeyneb Celaliyan par ji bo nîşandana nerazîbûna xwe ya li hemberî astengiyên li pêşiya dermankirina wê, dest bi greva nebikaranîna dermanan kir. Ev grev dewame. Her roja diçe rewşa Celaliyan hîn nebaştir dibe.
Pêşti rayedarên navenda tenduristiyê yên Girtîgeha Xoy bi nivîsekê daxwaz ji rayedarên girtîgehê kiribûn ku Celaliyan ji bo tedawiyê bişînin nexweşxaneyên derveyî girtîgehê. Lê rayedaran destûr nedane vê yekê.
Zeyneb Celaliyan hişyarî da rayedarên girtîgehê ku heya roja Şemiyê neşînin nexweşxaneyê, wê greva xwe ya ne karanîna dermanan ji bo çalakiyek cûdatir biguhere.
Zeyneb Celaliyan Di sala 2007’ê de li Kirmaşan ji aliyê hêzên rejîma Îranê ve hate girtin û hîna nehatiye berdan. Celaliyan ji ber endamtiya PJAK’ê tê tawanbar kirin.
Zeyneb Celaliyan rayedarên girtîgehê hişyar kir
