Jinên Rojavayê Kurdistanê çanda xwe ya kevnar ku heta vê demê anîne diparêzin û dibêjin ku çanda mirovan nasmeya neteweyîbûnê ye û divê ev nasname di destpêkê de ji aliyê jinan ve bê parastin.
Jinên Hesekê yên Rojavayê Kurdistanê parastina çanda xwe wekî erkek pîroz a li ser milên xwe dîtine û heta niha parastine.
Şukriya Hec Enter a ku genim di cir de dikute, anî ziman ku ew bi saya keda dayika xwe hînî parastina çanda xwe ya kevnar bûye û got: “Ev karê ku ez dikim ji bo min gelek bi wate ye. Lewra ez çanda xwe ya kevnar bi vî awayî diparêzim û bi bîr dixim. Ev erka li ser milê me hemûyan e divê em hemû bi taybet jî jin li keda xwe û çanda xwe xwedî derkevin.”Jina bi navê Gutna Hec Ehmed ku hiriyê bi teşiyê dirêse got: “Ez ji zarokatî de hiriyê bi teşiyê dirêsim. Vê çanda xwe ya kevnar bi kedeke mezin diparêzim ku çanda me winda nebe. Ji bo min karê destan û keda destan gelek pîroz e. Ji bo siberojek azad divê em li çanda xwe xwedî derkevin. Çanda mirovan nasmeya neteweyîbûnê ye û divê ev nasname di destpêkê de ji aliyê jinan ve bê parastin.”…Ronîda HACÎ/Hesekê
Netew bi çanda xwe tên naskirin
