Kolana Sinaa ya Taxa Şêxmeqsûd a Helebê di dema êrîşên ser taxê de wêran bûbû. Lê piştî YPG û YPJ’ê herêm ji dagîrkeran rizgar kir, ewleyî vegeriya herêmê û şêniyan dest bi kare xwe kir. Niha herêm bûye meqseda şêniyên Helebê.
Dema aloziya Sûriyê gihîşt Helebê, herêma Sînaa (pîşeyî) ya Taxa Şêxmeqsûd hat topbarankirin û bû herêmeke şer. Rêveberiya dewleta Sûriyê û çeteyên artêşa Tirk a dagîrker êrîşî taxê dikirin. Sala 2016`an YPG û YPJ`ê Taxa Seken Şebabî, Benî Zêd û Eşrefiye ji çeteyên Tirkiyê rizgar kirin. Piştî vegera ewleyiyê şênî vegeriyan warên xwe û ji nû ve dest bi karê xwe kirin.
Li kolana 15an ser 300î re dikan û werşeyên pîşeyî mîna mekanîk, hesinkar, kehrebeya erebeyan, dûzan û hwd. Hatin vekrin. Li rex wê jî bi dehan dikanên taybet ên firotina amûr û alavên pîşeyî û parçeyên guhertinê yên erebeyan hatin vekirin.
Zêdebûna nirxê dolar li beramberî lîreyê Sûriyê bi awayekî neyînî bandor li pîşesazên Helebê bi taybetî yên Taxa Şêxmeqsûd kir.
Tevî wê jî kolana pîşeyî ya li Taxa Şêxmeqsûd bûye meqseda şêniyên bajêr. Lewre bihayê li wir li gorî herêmên pîşeyî yên din guncawtir e.
Xwediyê werşeya sererastkirina heykela erebeyan Cîhad Merwan got, ji ber bilindbûna dolar em gelek zehmetiyan dikişînin. Ji ber wê em jî neçar in destheqê xwe bilind bikin.
Şaredariya Gel a Taxa Şêxmeqsûd hewl dide xebata bingehîn ji pîşesazan re peyda bike, da wan teşwîqî berdewamkirina pîşeyên xwe bikin.
