Hediya HISÊN
Ji bo bilindkirina asta xwendinê, Rêveberiya Xweser hewl dide derfetên xwendinê ji bo her kesî biafirîne û Sûriyeke demokratîk ava bike. Bi vê armancê ku Zanîngeha Rojava ava bûye, pêş dikeve û beşeke nû ya Mîkatronîka vedike.
Serokê peymangeha mîkatronîka Doktor Endezyar Kesra Hersan, li ser vê mijarê ji
rojnemeya me re wiha axivî: “Peymangeha mîkatronîka sala 2019an hat damezirandin û yekê meha 12an me dest bi xwendinê kir. Niha 14 xwendekar û 8 mamosteyên me hene. Em li bendê ne di demeke nêzîk de çend mamosteyên din jî tevlî me bibin. Piraniya materyalên me zanistî ne û endezyariya mîkatronîka ji beşa elektrîk, elektron û mekanîkê pêk tê. Heta niha dema vê beşê sê sal in, lê em dixwazin bikin pênc sal.”
Kesra Hersan axaftina xwe wiha bi dawî kir: “Xwendekarên me zû pêş dikevin û eger rewş baş bibe, em bi hêvî ne di dema pêş de ji bo xwendekaran kargeh jî ava bibin.”
Derbarê mijarê de, xwendekar Lewend Hecî Yûsif jî wiha axivî: “Piştî dewleta Tirk Efrîn dagîr kir em koçberî Şehbayê bûn. Piştî ku min li wir xwendina xwe qedand, min berê xwe da Zanîngeha Rojava. Niha li beşa mîkatronîka ku gelek endezyariyan digire nava xwe, dixwînim.”
Lewend axaftina xwe wiha domand: “Zanîngehê ji me re xewgeh jî ava kirye û ji bo pêşketinê mamosteyên me pir kedê didin. Sîstema xwendinê jî gelek pêşketî ye û ji xwendekarên Bakûr û Rojhelatê Sûryê re gelek derfetên pêşketinê vedike.”
Lewend axaftina xwe wiha bi dawî kir: “Destpêkê pirsgirêk pir bûn. Lê me ked da û em bi ser ketin. Xwendekar hemû jî bi vê rewşê kêfxweş in. Serkeftinê ji hevalên xwe tevan re dixwazim û spasiya mamosteyan û zanîngehê jî dikim.
