14. Festîvala Jinê ya Zîlan 23’ê Hezîranê dest pê dike

14. Festîvala Jinê ya Zîlan, îsal bi dirûşma “Parastina Efrînê parastina şoreşa jinê ye” li Elmanya tê lidar xistin.
Festîvala Jinê ya Zîlan ku her sal bi bernameyeke dewlemend tê lidarxistin, îsal cara 14’an pêk tê. Festîval wê 23’ê Hezîranê li bajarê Dortmund a Elmanyayê bê lidarxistin. Festîvala ku ji aliyê Tevgera Jinên Kurd a li Ewropayê (TJK-E) ve tê organîzekirin, bi dirûşma “Parastina Efrînê parastina şoreşa jinê ye” wê were lidarxistin.
Komîteya amadekar li ser festîvalê li hev civiya. Yek ji mijarên sereke yên festîvala îsal wê xwedîderketina li berxwedana serdemê ya li Efrînê û geşkirina têkoşîna li dijî êrîşên qirker ên dewleta Tirk a dagirker be.
Li Festîvala 14’an Zîlan, ku jinên ji nasname, bawerî û zimanên Kurdan lê bicivin, wê nûnerên TJK-E, Kongreya Star, rêxistinên jinan ên femînîst, nûnera Die Linke ya NRW û nûnerên yekîtiya Antifa VVN peyaman bidin. Jinên beşdar wê di panelan de pirsgirêkên jinan û rêyên çareseriyê di çarçoveya Jineolojiyê de binirxînin.
Ji bo zarokan jî amadekarî hatiye kirin. Bi vê armancê li parka zarokan a li festîvalê wê lîstikên cuda hebin.
Bernameya çand û hunerê ya festival,Koma Dengê Xwezayê, Jala, Sena Dersîmî, Sulbus û Tarî, Koma Jinên TEV-ÇAND’ê, koma dansê ya jinan a Hîndîstanê, koma jinên Elman a Duo Wabohu, dengbêja Ermenî Yekşa û hunermendên surprîz wê derkevin ser dikê.