Şêwekarekî ku mijarên hunera xwe ji hawirdora Firatê werdigire û bi peyker û tabloyên xwe yên hunerî dîrok û kevneşopiya herêmê vedibêje.
Şêwekar Cuma Seîd El-Hemo di sala 1968’an de li bajarê Reqqayê ji dayik bûye. Di destpêka salên 80’yî de girîngiyê dide şêwekarî û çêkirina peykeran. Di destpêkê de li ser mermer û kevirên reş şêwekariya xwe dikir.
El-Hemo li rex xwendina xwe ya enstûtiya kehrebeyê şêwekariya xwe dikir. Piştî demekê li navenda Hunera Şêwekariyê ya bajarê Reqqayê ji sala 1989’an heta 1996’an mamostetiya çêkirina peykeran dike. Her wiha di şîrketên dekor de jî dixebitî û ji sala 1988’an ve beşdarî gelek pêşangehên salane yên hunermendên Sûriyeyê dibe. El-Hemo beşdarî mîhrîcana El-Badiyê ya yekemîn û duyemîn dibe.Hunermed Cuma El-Hemo weke hemû welatiyên Reqqayê rastî zilm û hovîtiya çeteyên DAIŞ’ê dihat û ji ber xebatên wî yên hunerî gelekî ji aliyê çeteyan ve hatiye girtin û gelek peykerên ku çêkirine ji aliyê çeteyan ve hatine şikandin û desteserkirin. Hin peykerên ku çeteyan desteserkirine derbasî Tirkiyeyê bûne û li wir hatine firotin.
Piştî ku bajarê Reqqayê hat rizgarkirin, Meclisa Sivîl a Reqqayê hin peykerên ku El-Hemo çêkirine wergirtin û di hundirê avahiya Meclîsa Sivîl a Reqqayê de bi cih kirin. Peykerên ku hatine bicihkirin rewşa şer û wêranê ya li bajarê Reqqayê vedibêjin. Her wiha jiyana hevbeş di navbera pêkhateyan de di peykeran de diyar in û di tabloyan de jî mijarên girêdayî jinên Reqqayê tên vegotin.
Şêwekar Cuma Seîd El-Hemo behsa kurtejiyana xwe ya hunerî kir û wiha got: “Pisporiya min di çêkirina peykeran de ye. Ez beşdarî gelek pêşangehên li Sûriyeyê û li hin dewletên ereb bûme. Ez beşdarî gelek pêşangehên tekane û komî bûme. Piraniya xebatên hunerî yên min li ser kevirên reş, spî û li ser mermera îtalî ne.”
El Hemo got ku bi hatina çeteyên DAIŞ’ê re wî xebatên xwe yên hunerî rawestandin, nemaze ji ber ku gelek caran ji aliyê çeteyan ve hate girtin û hemû peykerên ku wî çêkirine şikandin û hin jî desteserkirin û wiha domand: “Piştî ku hatim berdan ez bi veşartî dixebitîm û min peykerên xwe di malê de binax dikirin.”
Cuma El-Hemo niha di çêkirina tabloyekê de dixebite. Tablo jî wêneyekî têkoşer Umer Eloş e. Her wiha ji bermahiyên siwareyên teqiyayî dê burcekî li bajarê Reqqayê weke bîranîn ava bike…Emîne El Elî..Reqqa
Li perava çemê Firatê peykerên hunerî
