Mala Jin a kampa El-Tiwêhîne ya gundewarê bakur-rojavayê Tebqayê ji bo başkirina rewşa jinên koçber di kampê de xebatên xwe berdewam dike û di van rewşên dijwar de kar ji jinan re peyda dike.
Mala Jin a kampa El-Tiwêhîne beriya nêzî 4 mehan hate vekirin û ji wê demê ve hewl dide rewşa jinên koçber ên di kampê de baş bike.
Mala Jin di hundirê kampa El-Tiwêhîne de ji 10 xebatkarên jin pêk tê û perwerdeyan ji jinan re organîze dikin.
Endama Rêveberiya Mala Jin a kampa El-Tiwêhîne Sîham El-Hesen El-Şewax derbarê kar û xebatên xwe de wiha got: “Armanca me alîkariya bi jinên koçber re ye da ku rewşa wan baştir bibe û hemû pirsgirêkên jinên koçber di aliyên madî û manewî de bêne çareser kirin. Em derfetên kar ji jinan re di hundirê kampê de peyda dikin.”
Girêdayî kar û xebatên Komîteya Lihevanînê ya Mala Jin Sîham diyar kir ku wan bêtirî 100 pirsgirêkên jinan ku piraniya wan girêdayî hevseran bûn çareser kirine.
Sîham da zanîn ku wan di kampê de kargeheke dirûtinê ji jinan re vekirine da ku jinên koçber karibin debara xwe werbigirin û got: “Bi hevkariya Meclîsa Jin a Tebqa û El-Curniyê me di kampê de kargeheke dirûtinê vekir da ku jinên koçber karibin di aliyê aborî de debara xwe bikin.”…ANHA
Pirsgirêkên jinên koçber tên çareserkirin
