Her çendîn dagirker dixwazin pêkhateyên bajarê Kerkûkê ji hev dûr bixin û bînin li hemberî hev gelên Kerkûkê bi lîstika sênî û zerf di meha remezanê de tên cem hev û vê lîstikê dilîzin.
Şevên Remezanê û piştî nimêja terawîha, li Kerkûkê kurd, Ereb û Tirkmen ji bo lîstina lîstika sênî û zerf têne gel hev.
Emîr Elî Ehmed yê ji netewa Ereb û xelkê Kerkûkê ye, têkildarî lîstika sênî û zerf wiha got: “Em îro li taxa îmam Qasmîn lîstika sênî û zerf dilîzin. Hemû pêkhateyên Kurd, Tirkmen û Ereb tevlî vê lîstikê dibin. Ji bo xelkê Kerkûkê di meha remezanê de lîstika sênî û zerf xwedî cihek cuda ye. Em li vir bi hev re dijîn. Kurd, Ereb û Tirkmen hemû weke bira ne.”
Xwediyê xwaringehê Hejar Ehmed yê ji Kerkûkê ye diyar kir ku lîstika sênî û zerf lîstikeke kevn e û wiha axivî: “Bi salane ev lîstik li bajarê Kerkûkê tê lîstin. Lîstik ji 6 kesan pêk tê û ew jî dibin du kom. Kîjan kom winda bike, pereyê hemû tiştên di dema lîstikê de hatine xwarin dide.”
Welatiyek din ê bajarê Kerkûkê Tariq Ebas jî diyar kir ku heval û dostên xwe ji bajarên cuda vedixwînin ji bo vê lîstikê. Tariq Ebas got ku gelek caran ew ji bo bajarên cuda jî tên vexwendin ku li wir dilîzin.
LÎSTIK ÇAWA TÊ LÎSTIN
Lîstîka sênî û zerf ji 11 zerf û sîniyekê pêk tê. Destpêkê gustîlek datinin nava zerfekê û ji aliyê koma yekem ve li pişt perdeyek reş tê danîn. Piştre jî li sêniyê tê xistin, ji bo neyê zanîn ew gustîl li nav kîjan zerfî de ye. Piştre sênî bi 11 zerfan ve tê danîn ber destê koma duyemîn. Koma pêşber ji bo dîtina zerf mafê wê heya ku du peyvên gul ji bo peydakirina gusttîlê bikar bîne.
Sênî û zerf gelan tîne cem hev
