Komîteya Çand û Hunerê ya Rêveberiya Sivîl a Demokratîk a herêma Tebqayê xebatên sererastkirina Navenda Çand û Hunerê ya li taxa duyemîn a bajarê Tebqayê didomîne û amadekariya merasîma vekirina navendê dike.
Ev nêzî 3 meh in xebatên sererastkirina navenda Çandê ya bajarê Tebqayê berdewam dikin, bi taybetî ji ber ku di encama hovîtiya komên çete yên cûda de di serdemên borî de rastî gelek ziyanan hatibû. Di serdema çeteyên DAIŞ’ê de jî navend weke baregeheke çeteyan dihat bikaranîn û têde lêpirsîn û îşkenceya welatiyan dihat kirin.
Niha gelek xebatên sererastkirinê hatin pêkanîn û derî û pencereyên navendê hatin siwarkirin û toreya wê ya av û elektrîkê hate sererastkirin.
Di qonaxa yekemîn a sererastkirina navendê de li şûna şanogeha navendê ku bi temamî hatiye hilweşandin, dikeke nû ya şanoyan hate çêkirin.
Girêdayî mijarê Endamê Rêveberiya Têkliyên Giştî ya Komîteya Çand û Hunerê Mesna Ebdilkerîm diyar kir ku niha ew li benda merasîma vekirina navenda çandê ne ku tê payîn di nîvê meha Hezîranê de pêk were û di merasîmê de dê gelek çalakiyên çandî bêne pêşandan…ANHA
Li Tebqa wê navenda çandê bê vekirin
