Nexweşxaneya Avrîn yek ji saziyên herî zêde şahîdiya hovîtiya dagirkeriya dewleta Tirk û çeteyên wê kiriye. Ji yekemîn roja êrîşan ve rasterast bû armanca balefirên faşîzma Tirk. Ekîpa Avrîn dizanîbû ku dewleta Tirk ti zagon û exlaqekî şer nasnake, ji ber vê jî di 15 Adara 2018an de û bi bilindbûna asta hovîtiyê re, hinek alav û amûrên nexweşxaneyê veguhestin navçeya Şerawa. Li wir jî nexweşxaneya Avrîn xizmeta tendirustiyê bi îmkanên heyî dewam kir.
AVRÎN HEWCEYÎ DOKTORÊN PISPOR E
Li Kantona Şehba li kêleka gelê Ereb, Tirkmen û Kurd bi hezaran Efrîniyên mecbûrî koçberiyê bûne dijîn. Ekîpa Avrîn a ji dehan nexweşnêr û heft bijîşkan pêk tê li navçeya Fafînê bi cih bûye. Di saheya avahiya nexweşxaneya Avrîn de çend Kervanên senkirin, mudexeleya lezgîn, wênegiriya pertewî û labratwarek hene. Lê dîsa jî Avrîn bi hewceyî doktorên pispor ên hemû beşan e.
XIZMET BÊ PERE YE
Nexweşxaneya Avrîn li kêleka xalên Heyva Sor a Kurd xizmetên tendirustiyê bê pere pêşkêş dike. Tevî kêmderfetiyan û nebûna gelek cureyên derman û doktorên pispor, rojane ji 300 heyanî 500 nexweşan pêşwazî dike. Ev jî ne li gorî kapasîteya alav, amûr û ekîpa Avrîn e.
EM LI KÊLEKA GELÊ XWE NE
Rêveberê nexweşxaneya Avrîn Dr. Abdulqadir Ico di vê derbarê de dibêje ku ew bi hinek doktorên ji Efrînê koçî hin deverên dîtir kirine re di nava têkîliyê de ne ku vegerin û xizmeta civaka xwe bikin. Derbarê doktorên li Şehbayê jî mane Ico dibêje: Erkekî exlaqî, mirovî û neteweyî li ser pişta van doktoran e. Ji ber vê jî li kêleka gelê xwe li vê herêma paşguhkirî mane.
BEŞ ZÊDE DIBIN
Nexweşxaneya Avrîn piştî Kîmar û Ehrezê li navçeya Fafînê bi cih dibe. Di rûpîvna xwe ya biçûk de beşên mudexeleya lezgîn a hundirîn, zarok, mudexeleya emeliyatê, labratwar, wênegiriya pertewî û dermangehek hene. Her wiha sê doktorên hestî, du yên hinavan, bijîşka jinan, bijîşkekî zarokan û 35 nexweşnêr û hinervan hene.
EM Ê EKÎPA XWE XORT BIKIN
Rêveberê Avrîn Dr. Ico tekez dike ku nexweşxane ji sedî 70 pêdivî û xizmeta tendirustiyê li vê herêmê pêk tîne. Lê dîsa kêmbûna derman û destekdayîna şermok cihê rexnê ye. Niha jî ew hewl didin bi desteka Cizîr, Kobanê û doktorên ji derveyî Şehbayê ekîpa xwe ya tendirustiyê xort bikin.
JI GEZA MAR Û DÛPIŞKAN RE DERMAN
Dr. Abdulqadir Ico dawiyê de got: Vê dawiyê gelek nexweşiyên nola rûvîkulî, wêran û leşmanyayê belav bûn
e. Çav li rêye bi alîkariya bi Heyva Sor a Kurd re dermanên pêwîst bên dabînkirin. Her wiha ji bo geza mar û dupişkan wê Heyva Sor a Kurd dermanên pêwîst dabîn bike.
Idrîs HENAN
