Siyasetmedar û rewşenbîrên navçeya Tirbespiyê diyar kirin ku hikûmeta AKP’ê hewl dide gelên herêmê ji fikr û felsefeya Rêberê Gelê Kurd Abdullah Ocalan dûr bixîne û di vê derbarê de tecrîdeke hişk li ser Ocalan ferz dike. Siyasetmedar û Rewşenbîran her wiha piştrast kirin ku di vê tecrîda li ser Ocalan de herî zêde Tirkiye ziyanan dibîne.
Hikûmeta AKP’ê tecrîdeke hişk li ser Rêberê Gelê Kurd Abdullah Ocalan ferz dike. AKP’ê ji sala 2011’an ve serdanên parêzerên wî qedexe kirine û ji îlona 2016’an ve serdana malbata wî jî qedexe kiriye.
Girêdayî mijarê hin siyasetmedar û rewşenbîrên navçeya Tirbespiyê ya kantona Qamişlo ji ajansa me ANHA’yê re axivîn û diyar kirin ku hikûmeta AKP’ê bi riya vî şerê xwe yê taybet hewl dide gelên herêmê ji fikr û felsefeya Rêberê Gelê Kurd Abdullah Ocalan dûr bixîne.
Endamê Rêveber ê Partiya Yekîtiya Demokratîk Silêman Hisên got ku gelên herêmê fikr û felsefeya Rêberê Gelê Kurd Abdullah Ocalan ji xwe re xelasî digirin dest û wiha got: “Dewletên komploker ên dijberiy agelê Kurd dikin nikaribûn fikra Ocalan sînordar bikin, nemaze niha fikra wî li giştî Rojhilata Navîn tê jiyîn. Her wiha gelek tevgerên rizgariyê yên cîhanê di felsefeya Ocalan de çareseriya herî guncaw dibînin û êdî fikra Ocalan veguheriye sembola gelên bindest.”
Endama Yekîtiya Rewşenbîran Merwa El-Hisên girêdayî heman mijarê got ku di nirxandina dîrokê de diyar dibe ku her tim dijminên doza Kurdî û bi taybet dewleta Tirk şerê fikr, çand û serkeftinên Kurdî dike. Merwa di axaftina xwe de got ku piştî gelên herêmê felsefeya Rêberê Gelê Kurd Abdullah Ocalan nas kirin, Tirkiye tecrîdeke hişk li ser Rêber Ocalan ferz dike da ku rê li pêşiya belavbûna fikra wî bigire.
Merwa behsa êrîşên artêşa Tirk a dagirker û komên çete yên girêdayî wê li dijî Efrîn, Kobanê û Şengalê kir û got ku evan êrîş di çarçoveya êrîşên wê yên ji bo tunekirina çanda gelên resen de pêk tên da ku ji rastiya wan a cewherî dûr bicîne û bi hemû derfetên xwe hewl dide gelê Kurd ji rewşa rêberê xwe û tenduristiya wî dûr bixîne.
Endamê Rêveberiya Yekîtiya rewşenbîran Nesar Elî got ku bê agahiyên gelên herêmê ji tenduristiya Rêberê Gelê Kurd Abdullah Ocalan hişt ku hêrsa hemû azadîxwazan zêde bibe.
Elî di dawiya axaftina xwe de wiha destnîşan kir: “Dewleta Tirkiyeyê nikaribû felsefeya Rêber Ocalan sînordar bike, nemaze niha diyar dibe ku sembola jiyana hevbeş a gelên herêmê ye. Tevî ku Tirkiye ne tenê beşdarê komploya navnetewî ye, lê dîsa jî têk çû ji ber ku gelên herêmê nexwestin ji bo berjewendiyên dewletên dagirker bibin amûr.” ANHA
