Çandinî ji bo welatiyên Reqayê hêmana sereke ya jiyanê ye. Pirraniya welatiyên Reqayê debara xwe bi çandiniyê dikin. Ji ber ku dewleta Tirk herikîna ava çemê Firatê birrî ye, bandoreke neyînî li rewşa çandiniyê ya herêma geliyê Firatê bûye. Her wiha ji ber kêmbûna barana îsal ziyaneke neyînî bi hilberîna çandiniyê bûye.
Rewşa çandiniyê di van salên aloziya Sûriyê de gelekî paşve çûye, bi taybet gelek pompên avê û kanalên avdana zeviyan rawestiyan û vê yekê bandoreke neyînî li giştî jiyana cotkaran kir.
Li herêma Reqa di van salên borî de ji ber gelek sedeman rewşa çandiniyê gelekî paşve çûye. Yek ji van sedeman şerê li herêmê bû, bi taybet gelek kanalên avdana zeviyan hatin hilweşandin û komên çete gelek pompên derxistina avê dizîn.
Sedema din a sereke ya paşveçûna çandiniyê ew e ku hikûmeta Tirk herikîna ava çemê Firatê li ser Sûriyê birrî ye û avê gelek kêm berdide.
Lê piştî ku bajarê Reqayê ji destên çeteyên DAIŞ’ê hate rizgarkirin, Komîteya Çandiniyê ya girêdayî Meclîsa Sivîl a Reqayê bi hemû hêz û derfetên xwe hewl dide rewşa çandiniyê ji nû ve vejîne. Komîteyê gelek pompên derxistina avê sererast kirin. Bi hatina demsala havînê re jî û demsala çinîna hilberînê komîteya Çandiniyê gelek alîkarî bi cotkaran re kir û niha hilberîna cotkaran dikirre.
Endamê Komîteya Çandiniyê ya Meclîsa Sivîl a Reqayê Îsa El-Hemadîn piştrast kir ku komîteya wan bi hemû hêz û derfetên xwe hewl dide rewşa çandiniyê li herêmê ji nû ve vejîne û di vê derbarê de hewl dide hemû pêdiviyên çandiniyê ji cotkaran re peyda bike.
El-Hemadîn destnîşan kir ku komîteya wan niha kîloya genim bi 175 lîreyan dikire.
Komîteyê her wiha tovê pembo ji cotkaran re peyda kir û hewl dide semad jî bi riya hin bazirganan peyda bike û buhaya wê jî diyar bike.
Di aliyê xwedîkirina sewalan de jî El-Hemadîn da zanîn ku Komîteya Çandiniyê hewl dide vî beşî jî pêş bixîne û dermanên pez û sewalan û êma wan peyda kirine.
Cotkara bi navê Zehra El-Mexrûd destnîşan kir ku hilberîna wan a genim ji ber lehiyên ji ber barana di van hefteyên dawî de ziyan dîtiye. Zehra bang li Meclîsa Sivîl a Reqayê kir ku alîkariya cotkaran bikin û rewşa çandiniyê li herêmê pêş bixînin…ANHA
Li Gelîyê Feratê çandinî bi bereket e
