Ayşa Silêman/Dêrik
Ji bo piştgiriya berxwedana gelê kurd li Rojavayê Kurdistanê beşek hunermend ji Başûrê, Bakur, Rojhilatê Kurdistanê û Ewrûpa serlêdana Rojavayê Kurdistanê kirin.
Ji bo piştgiriya berxwedana gelê kurd li Rojavayê Kurdistanê hunermend Diyar Yaşar, Îbrahîm çelik (hozan şemdin), Gulbahar Rahîmî (jala sîneyî), Logman salem Fattah, Denîz Nakî (futbolcî), Renas lazgin saadî, nivîskar Kakşar Khorshîdî (oremar) û rojnemevan Danial Jamali serlêdana Rojavayê Kurdistanê kirin.
Di derbarê berxwedanî û piştgiriya gelê kurd hunermend Hozan Şemdîn û rojnamevan Danial Jamali ji Rojnameya me re axivîn.
‘Hunermend wijdana gel e’
Hunermend Hozan Şemdîn diyar kir ku hunermend wijdana gel e û wiha pê de çû: Em wek girûpek hunermend û
nivîskar berê xwe da Rojavayê Kurdistnanê ji bo piştgiriya berxwedana gelê kurd, me xwestin derbasî nava gel bibin û wê berxwedana wan silav bikin. Dema em wan bi coş dibînin em gelek kêfxweş dibin, hêvîdarin ew ruhê ku derket holê û bi yek dengî bang dikirin bighêje armanca xwe. Tê naskirin ku hunermend wijdanê gel e û êşa gelê xwe berî herkesî dibînin, ji ber vê yekê rola hunerê girînge, her tişt bi demê re diçe lê huner dimîne. Di vê pêngavê de pêwîste hunermendên me bi rol û erkên xwe bilîzin û ew êşa ku tê serê gelê kurd derxînin.”
‘Heya kurd hebin wê Kurdistan jî hebe’
Rojnamevan Danial Jamali da zanîn ku ew berxwedana gelê kurd silav dike û wiha domand: “Min îro berê xwe ji
Ewropa da Rojavayê Kurdistanê da ku ji herkesî re isbat bikin ku kurd hene û wê hebin. Bila herkes bizanibin ku kurd zindîne, heya kurd hebin wê Kurdistan jî hebe. Ev ax axa me ye û em ê tucarî derfetê nedin tu kesî ku dest bavêjiyê, di heman demê de bila gelê Rojavayê Kurdistanê baş bizanibe ku li seranserî cîhanê kurd ji bo wan li ser piyane, wê heya dawî bi wan re bin.”
