Endamê Komîteya Rêveber a PKK’ê Mûrat Karayilan, Pêngava 1’ê Hezîranê û hilbijartinên 24’ê Hezîranê yên li Tirkiyê nirxand. Karayilan got, “Dewleta Tirk biryar daye ku HDP’ê di bin benda hilbijartinê de bihêle lê wê ev yek bi hêsanî pêk neyê.”
Karayilan diyar kir dewletê biryar daye ku HDP’ê li binê bendê bihêle, lê her tişt bi dilê dewletê nameşe. Ev yek bi karê gelê Kurd û hêzên demokrasiyê ve girêdayî ye. Serketina HDP’ê wê rê li ber pêvajoyeke nû ya demokratîk veke.
Endamê Komîteya Rêveber a PKK’ê Mûrat Karayilan, sedem û encamên pêngava 1’ê Hezîranê û hilbijartinên 24’ê Hezîranê yên li Tirkiye û Bakurê Kurdistanê nirxand.
Karayilan bi bîr xist ku tevgera azadiyê ya Kurdistanê bi pêşniyar û fermana Rêberê Gelê Kurd Abdullah Ocalan roja 2’ê Tebaxa 1999’an şer sekinand û got, “Heta Hezîrana 2004’an yanî 5 salan ji bo avakirina bingeheke çareseriya siyasî, ji bo dewleta Tirk dest bi diyaloga çareseriya demokratîk û aştiyane ya pirsgirêka Kurd bike, me fîşekek jî neteqand. Lê belê dewleta Tirk gav neavêt.”
BI XWESTIN TEVGERA ME TASFIYE BIKIN
Karayilan destnîşan kir ku bendewariya dewleta Tirk tasfiyekirina Tevgera Azadiyê ya Kurd bû û wiha dewam kir: “Armanca dîlgirtina Rêberê me bi rêya komploya navneteweyî ev bû. Bi hilbijartina 2002’an re AKP bû desthilatdar. Wan jî siyaseta înkar û tinekirinê bi heman rê û rêbazî dewam kirin. Bi rengekî hê veşartî û durû ev siyaset dewam kirin.”
Li ser vê siyaseta qirêj a desthilatdariya AKP’ê, Karayilan got “Sermeselê gotin, ‘Kurd birayên me ne’. Lê belê tiştek nekirin. Ji bo Tevgera Azadiyê ya Kurd tasfiye bikin serî li her rê û rêbazê dan. Siyaseta înkar, tinekirin û asîmîlasyonê dewam kirin. Herî dawî hin kesên li nava tevgera me bi kar anîn û xwestin bi destê wan tasfiye bikin. Bi vî rengî xwestin encamekê bi dest bixin.”
Karayilan destnîşan kir, piştî ku ev plana dewleta Tirk a dagirker ji her alî ve kifş bû, di civîna 2. a Kongra Gel de biryara Pêngava 1’ê Hezîranê hate dayin û ev biryar ji hingî ve bi cih tê anîn.
ŞERÊ EM DIKIN ŞERÊ XWEPARASTINÊ YE
Mûrat Karayilan da xuyakirin ku ji ber polîtîkayên qirêj ên dewleta Tirk, ew neçar man xwe biparêzin û got, “Şerê ku em dikin şerê xweparastinê ye. Dewleta Tirk ji bo tasfiyekirina me, gelê me tevdigeriya. Bêguman em xwe bi rengê îdeolojîk, çandî û siyasî ve diparêzin. Lê belê li cihê ku ev bê bandor hatine xistin, em neçar in xwe bi rengekî çekdarî biparêzin. Eger çek nebûya, dibe ku weke gel û tevger em niha qediyabûna. Lewma mafê me yê herî xwezayî ye ku li dijî van êrîşên berfireh xwe bi rengekî çalak biparêzin.
BIRYAR DANE HDP’Ê DI BINÊ BENDÊ DE BIHÊLIN
Endamê Komîteya Rêveber a PKK’ê Karayilan diyar kir, Erdogan û dewleta Tirk paşeroja xwe bi tasfiyekirina gelê Kurd ve girêdane û wiha pê de çû: “Dibêjin, ‘Eger Kurd bi ser bikevin, em ê têk biçin’. AKP’ê û dewleta Tirk biryar dane ku HDP’ê di binê bendê de bihêlin. Dixwazim vê destnîşan bikim; ev yek biryarek e. Tevî ku ji derve, ji Neteweyên Yekbûyî û gelek hêzên din rexne hatin kirin û hate destnîşankirin ku hilbijartin nabe ku di nava Rewşa Awarte de bê kirin, wan biryara hilbijartinê dan. Destpêkê dixwazin Kurdan li Tirkiyê biqedînin, piştre jî li Iraq, Îran û Sûriyê Kurdan biqedînin. Dibe ku hin Kurd niha baş fêhm nakin, ya jî xwe li nefêhmkirinê datînin. AKP û MHP’ê stratejiya xwe li ser vê bingehî ava kirine.”
HER TIŞT LI GORÎ DILÊ WAN NAMEŞE
Karayilan destnîşan kir ku her tişt li gorî dilê wan nameşe û got, “Niha di nava xwe de tifaq kirin. Bi MHP’ê re Tifaqa Cûmhûr kirin. Yên ku ji MHP’ê qut bûn û partiyeke din ava kirin, tevî hin partiyên din Tifaqa Millet ava kirin. Her du tifaq jî rastgir in. HDP bi tena serê xwe eniya demokrasiyê temsîl dike. Paşeroja komên ku li derveyî sîstemê hatine hiştin, di nava HDP’ê de ye. Di halê hazir de HDP ji bo demokrasiyê weke alternatîfekê têdikoşe. Mejiyê tifaqên din tekparêz an jî şoven e. Li ser maf û azadiyan polîtîkayeke xwe nîne. Li dijî hemû êrîş û fenên van hêzan, HDP dikare ji texmînan jî bêhtir deng bigire. Divê hemû xebatkarên HDP’ê, gelê Kurd, tevgera sosyalîst a Tirkiyê, Ermenî, Suryanî, Elewî, hêzên li derveyî sîstemê zanibin ku ev kar wê ne hêsan be. Divê zanibin ku biryara fermî ya dewleta Tirk ew e ku HDP’ê li binê bendê bihêle. Bi vê têgihiştin û zanebûnê divê her kes bixebite. Divê karekî welê bê kirin ku sed-du sed hezar dengan bidizin jî ev yek divê bandorê neke.”
DIVÊ HERKES LI BER POLÎTÎKAYA QIRÊJ RABE
Endamê Komîteya Rêveber a PKK’ê Mûrat Karayilan diyar kir ku rejîma AKP’ê û hêzên dewletê ji bo serneketina HDP’ê hemû derfetên xwe bi kar tînin û got, “Guhertina cihê sindoqan, danîna sindoqan li qereqolan, yekkirina sindoqan li gorî dilê xwe… Pêwîste gelê me bi vê zanibe û xwe sist neke. Her kesên ku dixwazin ev sîstema tekparêz û dîktator bê guhertin, girîng e di vê çarçoveyê de tevbigerin. Pêwîste kes li berjewendiyên xwe yên şexsî nefikire û li dijî polîtîkayên qirêj ên dewleta Tirk yekîtiyê esas bigire. Divê ne pirsgirêk be bê kî bûye namzet kî nebûye. Serketina di hilbiljartinê de wê deriyê bihuştê veneke, lê belê wê li Tirkiyê pêşî li destpêkirina pêvajoyeke nû ya demokratîk veke.”…ANF