Sûka jinan ya bi navê Papûle yek ji berhemên jinan e û bala hemû jinan dikişîne. Rojane jin berê xwe didin sûka Pepûle û li wir danûstandinê dikin.
Li bajarê Dêrikê sûka jinan ya bi navê Papûle di 23’yê meha Nîsanê 2018 an de ji aliyê Komîteya Aboriya Jin ya girêdayî Kogreya Star hat vekirin da ku jin bi hêsanî danûstandinê bikin .
Ji rêveberên sûka Pepûle Nejma Silêman li ser armanca vekirina sûkê axivî û diyar kir ku beriya sûk were vekirin wan di nava şert û mercên zehmet de jêre amadekarî kirine. Necma wiha got, “Ev sûk girêdayî Komîteya Aborî ya Jin ya Kongreya Star e. Di sûka Papûle de 21 dikan hene. Di vê sûkê de malbatên ku rewşa wan ya aborî nebaş e û ji bo ku debara xwe bikin lê dixebitin. Jin bi kêfxweşiyeke mezin li sûka Papûle de dixebitin.”
Rêvebara sûka Papûle Necma Silêman di dawiyê de wiha got, “Daxwaziya me ew e ku jin bi hêsanî werin sûka Papûle danûstandina xwe bikin.”
Jina bi navê Xîtam Heso ya ku di sûka Papûle de dixebite nêrîna xwe li ser sûkê anî ziman û diyar kir ku ew bi moralekî bilind karê xwe yê sûkê dike û wiha axivî, “Ez di destpêkê de cihê xwe di xebatên sûkê de digirim. Destpêkê me bi heşt dikanan dest bi xebatê kir. Lê niha hêjmar li sûkê buye 21 dikan.”
Xîtam Heso di dawiyê de da zanîn ku têkiliya wan bi bazirganan re gelek baş e û got, “em hewl didin ku ti pirsgirêk dernekevin.”
Jina Ereb ya bi navê Îsra Ehmed jî derbarê sûkê de kêfxweşiya xwe anî ziman û wiha got, “Em bi vî karî gelek kêfxweşin. Bi vî karî em alîkariya malbata xwe dikin. Ez dixwazim hemû jin werin vê sûkê danûstandina xwe bikin û her wiha cihê xwe di sûka Papûle de bigirin.”
Ronahî EHMED
