1’emîn Mihrîcana Zarokan li Şanoya Bajêr a Amedê dest pê kir. Mihrîcana ku ji 2 beşan pêk tê beşa wê ya yekemîn bi dawî bû û beşa duyemîn dest pê dike. Namzeta Parlementeriyê ya HDP’ê ya Amedê Remziye Tosun tevlî vekirina mihrîcanê bû.
Yekemîn Mihrîcana Zarokan a Amedê ku 27’ê gulanê bi pêşengiya Şanoya Bajêr a Amedê dest pê kir, berdewam e. Mihrîcana ku ji 2 beşan pêk tê beşa wê ya yekemîn bi dawî bû û beşa duyemîn dest pê dike.
Di beşa yekemîn de ji bo zarokan perwerdeya mîm, drama, kukla û hunerê hat dayîn û ji aliyê zarokan ve gelek berhem hatin afirandin. Di beşa duyemîn ku dê heta 3’ê hezîranê bidome de lîstîkên ku ji bo zarokan hatine amadekirin bê lîstin, ji aliyê Orkestraya Zaroka a Ma Musicê ku ji sed kesî pêk tê ve konser bê dayîn, li ser perwerdeya zarokan a mîm, drama û çêkirina kuklayan wê semînerek bê li dar xistin û berhemên zarokan ên ku di çarçoveya mihrîcanê de afirandine bên pêşandan.
Koordînatorê mihrîcanê Yavuz Akkûzû têkildarî mihrîcanê axivî û diyar kir ku mihrîcana ji aliyê zarokan ve rastî eleqeyeke mezin tê û wiha got: “Piraniya zarokan ji Komeleya Rengarenk û Weqfa Penaberiyê (Goc-Der) beşdarî mihrîcanê dibin. Ji xeynî zarokên van her du komeleyan gelek zarokên din jî beşdarî mihrîcanê dibin.”
ARMANCA MIHRÎCANÊ KURDÎ YE
Akkûzû diyar kir ku ji bo rojên derbas bûyî yên mihrîcanê ji bo perwerdeya zarokan mamoste ji Stenbol û Îzmîrê anîne û ev tişt anî ziman: “Her wiha çend mamosteyên li Amedê jî piştgirî dane van mamosteyên ku ji Stenbol û Îzmîrê hatine. Heta niha mihrîcan baş derbas dibe û di çarçoveya mihrîcanê de ji aliyê zarokan ve gelek berhem hatine afirandin.”
Akkûzû têkildarî armanca mihrîcanê jî got ku beriya ku Şaredariya Bajarê Mezin a Amedê ji aliyê qeyyûm ve bê dagirkirin ji bo zarokan gelek xebatên bi kurdî hatine kirin, lê piştî qeyyûm hemû xebat niha li şaredariyê bi tirkî tên kirin. Akkûzû destnîşan kir ku ji bo bala zarokên Amedê bikişînin ser kurdî, mihrîcaneke bi vî rengî li dar dixin.
Namzeta Parlementeriyê ya HDP’ê ya Amedê Remziye Tosun û gelek zarok tevlî vekirina mihrîcanê bûn. Di merasîma vekirina mîhrîcanê de Remziye Tosun axaftin kir.
Remziye, di serî de Mihrîcana Zarokan li hemû zarokan pîroz kir û got ku zarok di şert û mercên gelek xirab re derbas dibin û xwest ku ji bo zarokan tim bernameyên cuda bên çêkirin û wiha berdewam kir: “Li gelek deveran û li Kurdistanê ji ber şerê heyê mafên zarokan tê binpêkirin. Bi taybetî jî zarokên ku îro hatin tevli vê mîhrîcanê dibin zarokên di bin bandora şer de gelek mane ne. Ez jî dayik im û dizanim ku şer çiqas bandora neyînî li zarokan dike. Ji ber şerê ku qewimî derûniya zarokan gelek xirab bûye û îro hîn jî ev şer ji ber ku li Sûrê xanî tên weşandin bandora xwe berdewam dike. Îro pêdiviya zarokan bi çand, wêje û hûnere heye. Ev xebatên ji bo zarokan tên kirin wan gelek kêfxweş dikin. Kêfxweşiya zarokan kêfxweşiya me ye ji ber ku zarok pêşeroj û hebûna me ne.”
