Xebatkara Heyva Sor a Kurd Mejdolîn Sîno banga hestiyariyê li hemû saziyên mafê mirovan kir ku deng bidin gelê Efrînê yên ku li Kampên Şehbayê bi cih bûne. Mejdolin wiha got: “Gelê Efrînê yên ku li Kampên Şehbayê bi cih bûne tevî hemû zehmetiyan berxwe didin. Lê divê hemû saziyên mafên mirovan ên navneteweyî piştgiriyê bidin vê berxwedanê.”
Xebatkara Heyva Sor a Kurd Mejdolîn Sîno wiha got: “Gelek pêdiviyên gelê Efrînê yê ku li Kampên Şehbayê bi cih bûne hene, ji ber kêmasiya dermanan û şert û mercên dijwar nexweşiyên cuda belav dibe. Divê hemû cîhan dawî li bêdengiya xwe bînin û deng bidin gelê Efrînê yê ku li Kampên Şehbayê bi cih bûne.”
Mejdolînê da zanîn ku ew bi derfetên kêm hewl didin ku hemû pêdiviyên gel bi cih bînin û got: “Heta roja îro me wekî Heyva Sor a Kurd hewl da ku em hemû pêdiviyên Gelê Efrînê yên di kampan de bi cih bînin. Lê ji ber ku derfet kêm e, derman kêm e gelek nexweşî belav dibin û herî zêde jî zarok di bin bandora vê yekê de dimîne. Her wiha ji ber ku her diçe hewa germ dibe ev jî dibe sedem ku nexweşî bêtir belav bibin û nexweşiyên cuda derkevin holê.”
Mejdolînê diyar kir ku jinên ducanî jî di nav rewşek zehmet de ne û wiha dawî li axaftina xwe anî: “Ji ber ku alavên tenduristiyê û derman kêm in jinên ducanî dema ku diwelidin gelek zehmetiyan dikişînin. Divê ev zor û zehmetiyên ku gêlê Efrînê yên di kampan de dijîn ji aliyê hemû cîhanê bê dîtin û dawî li vê bêdengiyê bê.”…JINNEWS
Ji Heyva Sor banga hestiyariyê
