Ayşa Silêman/ Qamişlo
Rahêner û wênekêş Mihsin Gawî diyar kir ku wênekêşî dewamkirina jiyanê ye û wiha got: “Rojek bi ser min re derbas nabe ku ez wêneyan nekişînim ji ber ku bûye parçeyek ji giyanê min”.
Mihsin Gawî temenê wî 18 salin, ew ji bajarê Qamişlo ye. Tevî ku ew kesekî astengdare lê dev ji xewn û xeyalên xwe bernade. Ji sala 2020’an ve dest bi fêrbûna wênekêşiyê kiriye.
Mihsin Gawî di derbarê jiyan û karê xwe ji rojnameya me re axivî.
Kar û xebatên Mihsin Gawî
Mihsin Gawî da zanîn ku astengdarî ne ya bedenê ye lê ya hişmendiyê ye û wiha got: “Di sala 2020’an de ez li UNCEF beşdarî pewerdeya wênekêşiyê bûm, du heftiyan berdewam kir, him tewrî û him jî piratîk bi taybet ji bo kesên astengdar bû. Em 14 kes tevlî vê perwerdeyê bûn û mamosteyê me jî Azad Evdikê bû, di vê perwerdeyê de ez fêrî rêzikên bingehîn yên wênekêşiyê bûm. Êdî min kamîreyek kirî û dest bi projeyek taybet kir û ez jiyan û taleneta kesên astengdar bikşînim. Ev Proje li ser wênekişandin û belgekirina jiyan û jêhatîbûna kesên astengdar bû, da ku ez ji civakê re nîşan bikim ku ew jî xwedî şiyan û potansiyel in û dikarin gelek tiştan bikin. Bi rêya belge û medyayê min karî nêrîna cîhanê ya neyînî li ser van kesan veguherînim erênî. Piştî ku min xwe pêş xist, êdî ez bûm rahêner min zêdetirî 50 kesên astengdar û normal perwerde kirin. Di heman demê de min di rêxistina Nûdem, navenda Fînîqiya û komeleya Şawîşka de jî wane li ser wênekêşiyê dan. Di sala 2022’an de bi boneya Roja Cîhanî ya Astengdaran min belgefilmek li ser astengdaran çêkir, ev belgefilm bi 14 zimanên cîhanî hatibû wergerandin û li 15 welatan hat pêşkêşkirin. Her wiha li gel tîma Tîtra Hînar û bi Yekîtiya Jinan re me şano li ser kesên astengdar pêşkêş kirin. Bi armanca hişyarkirina civakê li ser kesên astengdar. Ji bo daxwazkirina mafên kesên astengdar, li Minbic û Qamişlo beşdarî konferansa furman bûm. Her wiha ji hêla UNCEF ve hatim xelatkirin di sala 2021’ê de wek baştirîn kesê astengdar li Bakur û Rojhilatê Sûriyê”.
‘Wênekêşî û çapemenî cewherê jiyanê ne’
Rahêner û wênekêş Mihsin Gawî axaftinên xwe bi van gotinan bi dawî kirin: “Wênekêşî û çapemenî cewherê jiyanê ne û mezintirîn navgînên belgekirinê li cîhanê ne. Belgekirina bi wêne û vîdiyo baştirîn rê ye ji bo mirov û civakê bawer bike. Min di jiyana xwe de ev kar kir û min dikarî vê rêyê berdewam bikim bi saya bav, dayîk, heval û mamosteyê min yê ku ez ji xwe re mînak dibînim Azad Evdikê bû. Lê ev demek e ez dûrî rûpelên xwe ketime, lê ez ne dûrî rastiyê me. Niha ez di hişmendiya xwe de li ser projeyên nû dihizirim û dixwazim gavên mezin biavêjim ku sûdê bidin kesên astengdar. Ez niha li bendê me ku rewşa welat aram bibe ku ez bi hêzeke xurt dest pê bikim. Wê di demên pêş de gelek şano û belgefÎlim werin çêkirin. Peyama min ji bo her kesê astengdar ew e ku tu carî bedena xwe ji bo xwe nekin astengî, em ê hemû bi hev re bighêjin hemû hêvî û daxwezên xwe. Her wiha em ê ji derdorê re tekez bikin ku em dikarin her tiştî bikin”.
