Namzeta HDP’ê ya Colemêrgê Leyla Guven ku dîl girtî ye, diyar kir ku Kurdên beriya niha deng dabûn AKP’ê ji ber sûcên dewletê yên li Kurdistanê kiriye êdî li dora HDP’ê dicivin.
Hevseroka Civaka Demokratîk KCD’ê û namzeta parlamenteriyê ya Colemêrgê Leyla Guven ku dîl girtî ye, bal kişand ser operasyonên qirkirina siyasî û got, “Bi hezaran hevalên me yên hêja li Kandira, Amed, Sîlîvrî, Şakran, Edîrne, Sîncan û gelek girtîgehên din dîl tên girtin. Ev yek nîşan dide bê desthilatdariya heyî çiqasî ji vê kevneşopiya siyasetê ditirse û nikare xwe lê rabigire.”
Guven da xuyakirin, ku AKP’ê hemû kredî û çavkaniyên li Kurdistanê qedandiye û got, “Em zanin ku Kurdên beriya niha dengê xwe didan AKP’ê di vê hilbijartinê de wê deng nede wan. Mirovên vê herêmê bi çavên xwe dîtin bê AKP’ê salên dawî teroreke çawa li Kurdistanê kir. Şaredariyên hatin desteserkirin, derxistina ji kar a karkeran, operasyonên qirkirina siyasî, girtin, girtina saziyan, kedkarên ji kar hatin avêtin, goristanên hatin xwerakirin, cenazeyên hatin teşhîrkirin. Bêguman gel wê vê zilmê ji bîr neke. AKP wê roja 24’ê Hezîranê çem û çem biçe.”
Guven li ser encamên hilbijartinê pêşdîtina xwe parve kir û got, “Ji rojava heta rojhilatê Tirkiyê, ji başûr heta bakur civak wê destekê bide HDP’ê. Wê Meclîsê bêyî HDP’ê nehêle.”
Leyla Guven bal kişand ser şert û mercên girtîgehê û got, bi bahaneya Rewşa Awarte bersiv ji gelek daxwazên wan ên bingehîn re nayê dayin, li qewîşa 22 kesî 32 kes dimînin û belasebep nayên berdan. Guven destnîşan kir ku tevî vê yekê jî ew bi coş in, bi moral in…MA
Hemû Kurd li dora HDP’ê dicivin
