Îsal di encama rewşa hewayî ya herêma Cizîrê de ziyanên mezin li hilberîna ceh û genim bûye. Desteya Çandiniyê jî tedbîrên ji bo alîkariya cotkaran wergirtin.
Herêma Cizîrê û Bakurê Sûriyê îsal zivistaneke zuha derbas kir û di destpêka Gulanê de baran bi dijwarî barî. Di encama lehiya ku li ser zeviyên çandiniyê rabû de andoreke neyînî li hilberîna çandiniyê kir.
Bi barîna barana buharê re, hişt ku simbilên ceh û genim bikevin xwarê û di palekirina wan de astengî derdikevin.
Di dawiya sala borî de bi armanca alîkariya bi cotkaran re Komîteya Çandiniyê ya girêdayî Desteya Aborî ya Cizîrê tova genim, cihe û semad bi deyn da cotkaran.
Endamê Rêveberiya Komîteya Çandiniyê Ehmed Silêman diyar kir ku hilberîna ceh ji sedî 70 û hilberîna genim jî ji sedî 55 ziyan dîtiye.
Silêman da zanîn ku wan serjimariyek di derbarê rêjeya ji sedî ya zeviyên çandiniyê ya hilberînên cûda di salên 2017 û 2018’an de pêk anîne.
Silêman anî ziman ku zeviyên li Cizîrê hatine çandin ji sedî 90 e û wiha got: “Ji sedî 50 bi ceh û genim hatine çandin, ji sedî 25 nîsk û baqil hatine çandin û ji sedî 15 jî pembo hatiye çandin.”
Silêman destnîşan kir ku wan biryar girtiye alîkariya cotkarên ziyan dîtine bikin.
Di derbarê çalakiyên çinîna hilberîna genim û ceh de Ehmed Silêman diyar kir ku wan buhaya paleyê ji patozan re diyar kirine û hevkariya xwe bi Yekîtiya Cotkaran û xwediyên patozan re didomînin her wiha mazot ji hemû patozan re peyda kirine…Nûrî UMER-ANHA
Hilberîna genim û ceh li Cizîrê kêm bûye
